مقارنة بين سوزوكى التو وعربيات مستعملة بنفس السعر 130 الف جنية بمواصفات وانظمة امان وكماليات اعلى

Read Time5 Minute, 23 Second

السلام عليكم ورحمة الله وبركاتة

اصدقائى الاعزاء هنتكلم عن العربية الجميلة سوزوكى التو … عربية تصلح للبنات والسيدات أهم مميزات سوزوكي التو هو معدل استهلاكها المنخفض للغاية للوقود حيث أنها تعد السيارة الاولى ضمن قائمة السيارات الاقتصادية لانها مش بتحتاج اكثر من 3 لتر علشان تمشى 100 كم  

بتقول ايه ياحاج عربية ايه ؟

سوزوكى التو موديل 2020 ب 130 الف جنية

هى دى عربية ؟

ايوه طبعا عربية يابانى محترمة وتنفع الستات والبنات يروحوا بيها الشغل والجامعة

يعنى هما علشان ستات يركبوا عربية ضعيفة وصغيرة ومافيهاش اى وسائل امان ؟

عيب عليك دى مش عربية اصلا !!!

دى احسن عربية موفرة فى الكوكب

يا عم الحاج ده كفاية الصاج الضعيف والاكصدامات الفايبر اللى تحس انها بلاستيك وبتتكسر من اقل ترييحة

عربية نازلة 800 سي سي يعنى موتور الفيات 127 اللى ب 15 الف جنية اقوى منها

عربية مانيوال يعنى سواقتها صعبه على السيدات وموضوع التوفير و3 لتر كل 100 كم كل ده نظرى

انما الواقع غير كده خالص لان العربية بتعمل فى اللتر 20 كم على الطريق السريع يعنى ال 100 كم بتستهلك بداية من 5 لتر مش 3 لتر خالص ولو داخل البلد بتوصل ل7 لتر

بس زيرو وده كفاية علشان تشتريها !!!

العربية نازلة زيرو صحيح … بس تقريبا يقصدوا زيرو كماليات وزيرو امان

عربية مافيهاش اى وسائد هوائية … ولا حتى للى سايق … ولا اى انظمة امان حديثة … لا فرامل

ايه بى اس ولا توزيع الكترونى للفرامل اى بى دى ولا اى حاجة …. انا مش فاهم ازاى دخلت البلد بالمواصفات دى واحنا سنة 2020

بلاش تخبيط فى الحلل عاوزين نروح

تروح فين بوشك ده …. ماشى ياسيدى

انا قصدى ان العربية حجمها صغير وخفيفة وده بيخليها محتاجة اكثر من اى عربية تانية … لانظمة امان ووسائد هوائية لانها اكثر عرضه للحوادث ومش ثابتة على الطريق وفى الملفات توازنها بيختل

وبعدين قدرة المحرك 47 حصان عند 6000 لفة فى الدقيقة يعنى لازم تولع فى الموتور وتوصل عدد لفاته 6000 لفة فى الدقيقة والصوت يسمع آخر الشارع … علشان فى الآخر يديك 47 حصان … وعلشان تعرف الفرق فمثلا اقل عربية فى مصر قدرتها بتكون حوالى 108 حصان يعنى الضعف

عزم الموتور بتاع الالتو  68 نيوتن متر عند 3500 لفة فى الدقيقة و اقل عربية فى مصر عزمها مايقلش عن 134 نيوتن متر يعنى برضه الضعف وطبعا عزم ضعيف زى ده يعنى بطة بلدى و لو حبيت تشغل التكييف لا هتلاقى عزم فى العربية ولا تكييف

حتى الزجاج الكهربا قدام بس …. وبخلوا  يركبوا زجاج كهربا وراء يعنى لو حد ركب معاك ونسي يقفل زجاجه هتقطع علاقتك بيه … وممكن انت شخصيا تنسي تقفل الزجاج اللى ورا  وتسيب العربية مفتوحة وحتى لو افتكرت فانت مضطر تنزل وتقعد تفتح البيبان اللى وراء وتقفل زجاجهم …. تحس ان اللى عمل العربية دى بيرازى فينا

خامات التابلوه والابواب من الداخل كلها بلاستيك رخيص

صحيح العربية ارتفاعها 16 سم عن الارض بس لو ركب 3 ورا…  او 2 ثقال … العربية بتريح وبتحك فى جميع المطبات الحكومية والخاصة وعفشة العربية ضعيفة وبتحتاج لصيانة كتير واخيرا … قطع الغيار غير متوفرة بسهولة وسعرها غالى … ده على اساس انها يابانى وكده

طيب يعنى اللى معاه 130 الف جنية وعاوز يركب عربية محترمة يجيب ايه؟

يركب عربية مستعملة موديل قريب 1600 سى سى اوتوماتيك بتكييف وزجاج كهرباء وكماليات وانظمة امان كاملة … وفتحة سقف كمان لو عايز

هقولكم احسن عربيات مستعملة فيها كماليات وامان وشكل وفخامة ب 130 الف جنية بس … وعلشان تتأكدوا وماحدش يشكك فى الموضوع هوريكم ناس عارضين عربياتهم بالسعر اللى قلنا عليه على اولكس بتاريخ النهاردة وفى الآخر هنتكلم شوية عن العربيات دى وهرتبهم حسب الافضل

استعراض العربيات من موقع اولكس  

بعد ماستعرضنا العربيات المحترمة اللى ممكن تجيبها بمبلغ 130 الف جنية واللى بيطلق عليها اسم عربية او سيارة مش شغل التكاتك اللى شوفتوه فى بداية الموضوع

هرتبلكم العربيات اللى استعرضناها حسب الافضل من ناحية الاعتمادية والموديل الاحدث وانظمة الامان الكاملة والاوفر فى استهلاك البنزين والاقل سعرا فى قطع الغيار والصيانة 

لكن قبل مانعمل الكلام ده هسأل شوية اسئلة وهحطها كاستطلاع رأى علشان الموضوع ده مهم جدا وممكن اعمله فيديو مقارنة تفصيلية بين الزيرو والمستعمل لو لاقيت فى تفاعل مع الفيديو ده

السؤال الاول هو …. علل؟

هل تعتقد ان العربية الزيرو اللى هتشتريها 2020 هتكون افضل من عربية مستعملة موديل حديث بنفس السعر؟

السؤال الثانى

تفتكر لو حبيت تبيع عربية بعد ماشتريتها علشان مثلا اخدت فيها مقلب او ماطلعتش زى ماكنت متوقع … هتخسر كام فى الميه من ثمنها لو كانت زيرو وكام لو كانت مستعملة ؟

السؤال الثالث

تفتكر المبلغ اللى معاك اللى عاوز تشترى بيه زيرو يجبلك ايه مستعمل موديل حديث وهل الفرق بينهم فى المواصفات هيكون كبير ؟

الاسئلة دى … مهم جدا انك تجاوب عليها قبل ماتفكر تشترى عربية زيرو اليومين دول !!!

اما بالنسبة لمقارنة النهاردة بسعر 130 الف جنية

نصيحة  لوجه الله من اخوك … فكر كويس واستشير عيلتك واصدقائك قبل ماتشترى سوزوكى التو

الفرق بينها وبين المستعمل اللى فى حدود السعر ده فرق السماء والارض

ولو هنرتب العربيات اللى استعرضناها بالافضلية لو شاب او بنوتة وبتحب العربيات الهاتشباك

المركز الاول البيجو 307 اعلى فئة موديل 2007 جميع الكماليات بفتحة سقف

المركز التانى هيونداى ماتريكس او لافيتا موديل 2002 اوروبى

المركز الثالث رينو سينك موديل 2006

المركز الرابع  جولف 4 موديل 1999 اعلى فئة فتحة سقف

المركز الخامس هيونداى جيتز موديل 2006

المركز السادس هيونداى اى 10 موديل 2011  

اما لو عايز عربية سيدان

المركز الاول هيونداى النترا موديل  2011 اعلى فئة

المركز الثانى شيفرولية اوبترا موديل من 2007 الى 2009 اعلى فئة

المركز الثالث شيفرولية كروز موديل 2010

المركز الرابع رينو لوجان موديل 2016

المركز الخامس نيسان صنى موديل 2015

المركز السادس سيتروين سي اليزية موديل 2014

المركز السابع مازدا 3 موديل 2007

المركز الثامن بيجو 301 موديل  2015

المركز التاسع ميتسوبيشى لانسر موديل من 2005 الى 2007

المركز العاشر نيسان تيدا موديل 2007

المركز الحادى عشر بروتون جين 2 موديل من 2010 الى 2015

المركز الثانى عشر اوكتافيا من موديل  2001 الى 2007

المركز الثالث عشر فورد فوكاس موديل  2008 هاى لاين بفتحة سقف

المركز الرابع عشر شيفرولية افيو من موديل 2011 الى 2014

المركز الخامس عشر كيا سيراتو موديل 2010

المركز السادس عشر دايو لاسيتى موديل 2004

المركز السابع عشر رينو ميجان 2006 اعلى فئة بفتحة سقف

المركز الثامن عشر هيونداى فيرنا موديل 2012

المركز التاسع عشر للناس اللى بيحبوا الفخامة مرسيدس 230 موديل 1985 اعلى فئة بفتحة سقف  

اما بقا لو عايز عربية اس يو فى او 4*4 فعندك اختيارين

الاس يو فى ,,, شيرى تيجو اعلى فئة هاى لاين بفتحة سقف موديل 2010

ال 4*4 ,,, جيب شيروكى موديل 1996  

اما لو اسرة كبيرة تبقا اللى هتناسبك كيا كرنفال اعلى فئة بفتحة سقف واتنين تكييف موديل 1999

كل العربيات اللى عرضتها فى الموضوع فيها جميع الكماليات وانظمة الامان واوتوماتيك ويعتمد عليها وموديلاتها قريبة وحالاتها جيدة جدا

فى النهاية اتمنى اكون قدمتلكم معلومة مفيدة

اشكركم لحسن المتابعة

السلام عليكم ورحمة الله وبركاتة

1 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01113276111 - 01201039849
Happy
Happy
100 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts