مميزات وعيوب هيونداى كريتا 2020 الكروس اوفر الكورية الهندية تقييم شامل

Read Time5 Minute, 35 Second

السلام عليكم ورحمة الله وبركاتة

تقييم السيارة هيونداي كريتا وهى عبارة عن  كروس اوفر بروح الهاتشباك !

شركة هيونداي موتور هي فرع من مجموعة سيارات هيونداي وكيا في اسيا، وهي ثاني اكبر شركة في كوريا الجنوبيه بعد شركة سامسونج للادوات الكهربائيه، وتعتبر رابع اكبر مُصنعي السيارات علي مستوي العالم من حيث عدد السيارات المباعه سنويًا،

“شنج جو ينج” اسس شركة هيونداي موتور سنة 1967، واول عربية للشركة بالتعاون مع شركة فورد الامريكيه، هي هيونداي كورتينا، انضمت شركة هيونداي موتور الي سوق الولايات المتحدة عام 1968 مع الموديل هيونداي اكسيل، ومن هنا بدأت نجاحات وانتشار علامة هيونداي في شتي انحاء العالم.

كريتا زى ما قالت شركة هيونداي الاسم ده مأخوذ من جزيرة كريت اليونانيه، ومن كلمة Creative بمعنى الابتكار والابداع، هيونداي كريتا اللي بتعتبر الاخت الصغري لـ هيونداي توسان، وتُسمى في بعض الدول الاخري ب  ix25،

العربية دى مبنيه علي نفس قاعدة بناء كيا سول والنترا AD 2020 وكيا سيد، بلد المنشأ  كوريا الجنوبيه الا انه بيتم تجميعها في الهند، وهي منتشرة بشكل كبير في الهند اكثر من البلاد التانية، وتم بيع اكثر من 200 الف عربية من هيونداي كريتا في الهند في وقت قصير جدًا،

شركة هيونداي كانت منزلاها في فئه الكروس اوفر، ولكن في الحقيقة العربية  تصميمها مش ضخم زى عربيات الكروس اوفر الموجودة في فئتها السعريه، يعنى هتلاقيها مرتفعة عن الارض لكنها مش كبيرة فى الحجم، و لولا  ارتفاعها عن الارض كنا اعتبرناها هاتشباك صغيرة علشان كده العربية بتجمع بين مميزات الكروس الاوفر في الارتفاع عن الارض، ومميزات الهاتشباك في التصميم الصغير والشكل الرائع الملفت للانتباه.

هنتعرف علي جميع مواصفات هيونداي كريتا موديل 2020، وهنعرف اللى بيميزها عن اقرب المنافسين ليها زى نيسان قشقاي وميتسوبيشي اكليبس، وهقول نقط الضعف اللي بتخلى هيونداى كريتا مش افضل خيار في الفئه السعريه دى، العربية  بتنافس في فئه سعريه قويه جدًا ومليانه بالعربيات المحترمة، بتنافس نيسان جوك و وكيا سول المبنيه علي نفس قاعدة بنائها، و فورد ايكو سبورت، وواضح طبعا من العربيات دى صعوبة المنافسه

هنشوف هل هيونداى كريتا قادرة فعلا انها تصمد امام العمالقة اللى قولنا عليهم ولا لأ

نبدأ على بركة الله

هنبدأ بالتصميم الخارجي

فيها المصابيح الخارجيه بتيجى باضواء نهاريه  LED، مع شبكة من الكروم المعروفة لشركة هيونداي هنلاقى ان تصميم العربية من قدام شبه اختها السيدان بشكل كبير هيونداي اكسنت HCI والنترا، وبتنزل العربية بإشارات علي المرايات الجانبيه، وجنوط 17 انش من الالومنيوم شكلها مميز جدًا، مع مصابيح للضباب ومقابض للابواب من الكروم.    

بالنسبة للتصميم الداخلى

العربية من الداخل واسعه ومريحه علي عكس المتوقع، فتصميم التابلوه عصري ومميز، مع الوان فتحات التكييف الحمراء بتدى شكل مميز جدًا للمقصورة الداخليه للعربية ، العربية روحها شبابيه وده بيبان من الخطوط الحادة فى التصميم الداخلى، اما عن الخامات فهنلاقى ان اغلب الخامات من البلاستيك سواء في التابلوه او الابواب، مستوي الجودة بشكل عام فى الخامات والتقفيل الداخلى متواضع ولا يتفوق علي المنافسين، لكن بالرغم من كده فالعربية  من الداخل مريحه جدًا، وده بسبب التكييف ثنائي المناطق وفتحة السقف، بالنسبه لمساحات الركوب فالمساحه الاماميه واسعة ، ووضعيه القيادة مريحة، والمساحة الخلفيه معقولة خاصة مع صغر نفق الفتيس، ومساحات التخزين داخل العربية مناسبة جدًا، ومساحة الشنطة الخلفيه 475 لتر.  

اما بالنسبة للمواصفات الفنية وقوة الموتور

نبدأ بوضعية القيادة، هتلاقى وضعيه القيادة مرتفعة وكاشفة الطريق كله ، زى عادة العربيات الكروس اوفر، مساحات الرؤيه مميزه جدًا، ومافيش نقاط عمياء تقريبًا، ومساحة الزجاج الجانبي مميزه جدًا ومناسبه للعائلات، خاصة مع وجود فتحة السقف وده اللى بيخلى العربية عائلية  بشكل كبير، العربية بشكل عام تحس انها تصلح كفئة اقتصادية ، والكلام ده واضح من الخامات والشاشة الوسطية اللى بحجم خمسه بوصة الموتور 4 سليندر بسعة  1600 سي سي، بيدى قدرة 123 حصان عند 6400 لفة فى الدقيقه، وبيدى عزم دوران 151 نيوتن.متر عند 4850 لفة فى الدقيقه، الموتور ده متصل بفتيس اوتوماتيك ست سرعات، والعربية شغالة  بنظام الجر الامامي وبالنسبة للتسارع من صفر الي 100 كم/ساعة في 12 ثانيه، والسرعة القصوي 170 كم/ساعة، وسعة خزان الوقود 55 لتر

الموتور في العربية دى ادائه مميز ونشط جدًا، رغم ان قدرة الموتور بتظهر علي عدد لفات كبير، لكنه  بيشتغل بأداء جيد بسبب وزن العربية الخفيف، العربية مش اقتصاديه في استهلاك الوقود خالص، لانها  بتستهلك من 8 الي 9 لتر بنزين لكل 100 كم مقطوعة والارقام دى مش الارقام الرسميه اللى مكتوبة على بورشورات الشركة، ولكن دى عن تجربتى الشخصية اما الارقام الرسمية 7.1 لتر لكل 100 كم  

لو بصينا على  نظام التعليق او العفشة هتلاقى العربية ثابته بشكل كبير جدًا علي السرعات العاليه اكثر من المتوقع، اما علي السرعات المنخفضه داخل البلد، هتلاقيها مريحة ومش هتحس بالنقر والمطبات الي حد كبير، فى المناورات علي السرعات العاليه هتلاقى جسم العربية بيميل لكن ده موضوع  متوقع طبعا ، بسبب ارتفاعها وصغر حجمها، التوجيه فى العربية معقول ، لكنه مش رياضي ولا سريع ، لكن في الاستخدام العادي مش هتحس باى عجز.

بشكل عام العربية  دى مش رياضيه ولا بتقدم افضل اداء بين المُنافسين في النقطة دى، بالنسبة للعزل الصوتي فى الكابينة الداخلية  مش هتسمع اى اصوات ضوضاء خارجية من الشارع لما تقفل الزجاج اما صوت الموتور و نظام التعليق فهو مسموع  وواضح جدا،  وعلي السرعات العاليه وبداية من السرعات المتوسطة  هتسمع صوت الهواء بشكل كبير وده بسبب تصميم العربية اللى عامل زى الصندوق ، وارتفاعها عن الارض

بالنسبة للقيمه مقابل السعر

هيونداى كريتا  بتقدم العديد من المواصفات والمميزات فى الفئة السعرية دى، ولكنها مش افضل قيمه مقابل سعر قدام منافسينها و خاصة الاوروبيين، وده بسبب الاعفاء الجمركي علي السيارات الاوروبيه اللى خلى سعرها ينزل وبقت منافس قوى وكمان العربية مش نازلة بمواصفات امان في الفئات الاولي، واعلي فئه منها فيها 2 وسادة هوائيه فقط، علشان كده هنلاقى ان باقي المنافسين بيتفوقوا علي كريتا في القيمه مقابل السعر.

يعنى ملخص كلامنا

مميزات هيونداي كريتا 2020

نظام التعليق بتاعها متميز

ثباتها ممتاز علي السرعات العاليه

عزلها للاصوات الخارجيه معقول

مُرتفعه عن الارض وبتُناسب الشوارع المصرية

التصميم الخارجي هجومي وقوي

بتتميز بسهولة اعادة البيع زى باقى عربيات شركة هيونداي

العربية نازلة مع حساسات ركن

الشنطةالخلفيه بمساحة تخزين واسعه 475 لتر

عيوب هيونداي كريتا

حجمها صغير نسبيًا بالنسبة لعربيات الكروس اوفر

إمكانيات وكماليات كريتا قليلة بالنسبة لباقى عربيات هيونداي

وسائل الامان فيها متواضعة جدا وتعتبر نقطة ضعف

عزل صوت الموتور مش كويس ، وصوت الهواء واضح  جدا بداية من السرعات المتوسطة

هيونداى كريتا لا تعتبر افضل قيمة مقابل سعر بين منافسيها

يعنى من الاخر  عربية متوسطة، لكن طبعا فى احسن منها ، ومش بتقدم الافضل فى الكماليات ولا انظمة الامان، لكنها عربية من شركة هيونداي، يعنى … اعادة بيعها بتكون سهله، وموتورها  6 سرعات اعتمادي، مافيهوش اي مشاكل بعكس هيونداى توسان مثلا اللى اغلب الناس اشتكوا منها

يعنى من الاخر  العربية ماتنفعش شاب عاوز كماليات واداء رهيب، لكنها مناسبه لعائلة صغيرة        

متوفرة في السوق المصري  بخمس فئات كعادة توكيل غبور

الفئة الاولى 343,000 جنية

الفئة الثانية 363,000 جنية

الفئة الثالثة 388,000 جنية

الفئة الرابعة 408,000 جنية

الفئة الخامسة 418,000 جنية

فى النهاية اتمنى اكون قدمتلكم معلومة مفيدة

اشكركم لحسن المتابعة

السلام عليكم ورحمة الله وبركاتة

0 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01004003204 - 01008330575
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts