مميزات وعيوب نيسان قشقاى 2020 الكروس اوفر اليابانية الامريكية تقييم شامل

Read Time4 Minute, 49 Second

السلام عليكم ورحمة الله وبركاتة

تقييم نيسان قشقاي – فى فئة السيارات الكروس اوفر المتوسطة السعر من شركة نيسان !

من وقت طويل وشركة نيسان معروفة في الاسواق المصريه، وبتتميز الشركة دى بأن عربياتها من اكثر العربيات الاعتمادية، وهنلاقيها دايما منتشرة في الشوارع المصريه، لان العميل المصرى بيحب العربية اللى بتعمر معاه ومايرحوش بيها كثير التوكيل او مراكز الصيانة … الى اخره،

وبتتميز منتجات شركة نيسان عن باقى الشركات  بالاعتمادية وانخفاض مصاريف التشغيل.

هراجع  مع حضراتكم عربية من اقوي مبيعات فى شركة نيسان خاصة في الاسواق المصريه، نيسان قشقاي 2020،

الاسم ده نسبة لقبائل بتعيش في جنوب ايران اسمها  قبائل قشقاي، وهي عربية  كروس اوفر بتتصنع من سنة 2006، عربية  يابانيه لكنها بتتصنع في الولايات المتحدة الامريكية ، وده مخليها مزيج متميز من الاعتمادية والفخامة في وقت واحد.

هنتعرف علي جميع مواصفات نيسان قشقاي واهم الحاجات اللى بتميزها عن منافسينها اللى فى نفس الفئه السعريه ده لو كان فى حاجة اصلا بتميزها،

العربيات  الكروس اوفر ميزتها عن غيرها من الفئات انها عالية عن الارض ارتفاعها 22 سم والموضوع  ده مفيد جدا فى مصر، بسبب ظروف الشوارع المصريه وكثرالمطبات وحجمها ، وعلشان الموضوع  ده شركات السيارات بقت بتركز علي تصدير العربيات  الكروس اوفر للاسواق المصريه ومنطقة الشرق الاوسط العربيات اللى بتنافس قشقاى اختها نيسان جوك 2020 و رينو كابتشر 2020 ورينو كادجار 2020 وسيات ارونا وتويوتا C-HR وهيونداي كريتا 2020، وطبعا واضح من الاسماء والانواع المحترمة ان المنافسة قوية جدا

التصميم الخارجي

العربية تصميمها متميز جدًا وهجومي بشكل كبير ومليان خطوط حادة رياضية ، وهتلاحظ ان تصميمها مزيج بين التصميم الياباني والامريكى وبتتفوق نيسان قشقاى على مُعظم مُنافسيها في التصميم الخارجي، لكن طبعا موضوع التصميم ده اذواق.

والشكل مش كل حاجة بالنسبة للتصميم الداخلى داخل الكبينه هتلاقى لمسات اوروبيه مسيطرة علي التصميم، سواء في شكل التابلوه او التنظيم البسيط للزراير بالنسبة لمستوي الخامات هتلاقيه متميز جدًا والبلاستيك فيه مش كتير ونوع قوى وغالى ، بالنسبة لمساحات التخزين الداخلية هتلاقى ان العربية واسعة جدًا من الداخل، والمساحة الاماميه للسائق واسعه ومريحة، ومساحة الشنطة الخلفية 430 لتر وممكن تعديل وضعية القيادة زى ماتحب علشان توصل لاكثر وضعيه مريحة، والكراسي مريحة بشكل كبير اما بالنسبة للمساحة الخلفيه، فهى مناسبه لركوب ثلاث اشخاص طوال وباحجام كبيرة بشكل مريح ، وده بسبب انخفاض نفق الفتيس.  

ابزر التجهيزات فى العربية هي فتحة السقف البانوراما ومثبت السرعة، ومكيف الهواء ثنائي المناطق والاضاءة الزنون، بس للاسف تجهيزات الامان هتلاقيها متميزة في الفئات العالية فقط … ومش فى كل الفئات، يعنى اعلي فئه نازلة بـ 6 وسائد هوائيه وABS وESP وEBD وHill Start Assist و Brake Assist، اما الفئات الاولى فوسائل الامان فيها عادية والعربية حصلت علي خمس نجوم امان في الاختبارات الاوروبيه، اليورو ان كاب.  

مواصفات واداء الموتور

نيسان قشقاي نازلة بموتور 1200 سي سي تيربو ، قدرتة  117 حصان عند 4500 لفة فى الدقيقة، وعزم دوران 190 نيوتن.متر عند 2000 لفة فى الدقيقه، الموتور متصل بفتيس اوتوماتيك  CVT التسارع من صفر الي 100 كم / ساعة في 11 ثانيه والسرعة القصوي 185 كم / ساعة، وسعة خزان الوقود 65 لتر اداء الموتور ممتاز وده علي عكس المتوقع من موتور 1200 سى سى  على وزن كبير زى ده لان الموتور قدرتة 117 حصان  لكن نلاحظ ان العربية بتقدم كامل العزم علي عدد لفات قليل جدًا وده بيدى قوة للعربية وتسارع ممتاز.

اداء الموتور سلس ومتناغم علي السرعات القليله والمتوسطة، ولكن علي السرعات العاليه يظهر ضعف الموتور بشكل كبير، ولازم تضغط علي الموتور وترفع عدد لفاته علشان توصل لافضل اداء، وده طبعا  هيرفع استهلاك الوقود ويعتبر اكبر عيب فى العربية دى لكن عند الاستهلاك الطبيعي للعربية هتلاقيها موفرة للوقود بشكل كبير، يعنى بوجه عام العربية موفرة للوقود بس مش علي السرعات العاليه.  

بالنسبة لقاعدة بناء قشقاى وتعاملها مع الشوارع المصريه

هتلاقيها علي السرعات المنخفضة  بتمتص المطبات وبتكون مريحة جدًا، ومافيش اي مشكلة فى موضوع الراحة، والكراسي مريحة جدًا، بالاضافه لارتفاع العربية عن الارض واللى يعتبر ميزة كبيرة جدًا بالنسبه للشوارع المصريه وكثر المطبات والنقر  اما  علي السرعات العاليه فثبات العربية متميز جدًا وارتفاع عن الارض مش بيأثر على ثباتها ، علشان كده هتلاقيها متوازنه بين الراحة والثبات. بالنسبة  لثباتها في الملفات على السرعات العالية فبيكون الميل محسوس جدا، وده بسبب الارتفاع الكلى والتوجيه في الملفات غير دقيق واستجابته سيئة نتكلم فى العزل الداخلى للصوت علي السرعات المنخفضة داخل البلد، عزل الاصوات الخارجيه سيئ ، والاصوات الخارجيه للعربيات والناس مسموعة  داخل الكابينة ، اما علي السرعات العاليه هتلاقى صوت الهواء واضح جدًا داخل العربية، مش كده وبس ده كمان صوت الطريق والكاوتش، وده يعتبر عيب كبير جدا في العربية نيسان قشقاى مش بتقدم قيمه مقابل السعر ومش هى الافضل في فئتها السعريه بالرغم من انها المفروض نازلة بتخفيض جمركي لأنها عربية اوروبية ، العربية بتقدم مواصفات كويسة لكنها مش الافضل، يعنى مثلا رينو كادجار او سيات ارونا 2020 يبيقدموا كماليات افضل منها رغم انها في نفس السعر تقريبًا.      

يعنى النتيجة اللى هنخرج بيها من الفيديو ده ان

مميزات نيسان قشقاي

عربية عائلية و صالونها واسع ومريح جدًا

خاماتها ممتازة جدًا زى الفرش الجلد او خامات التابلوه وتصميمها الداخلي فخم

التصميم الخارجي متميز جدًا ورياضى

مساحات التخزين الداخلية كتيرة وواسعة  بالاضافه الي امكانية طي المقاعد الخلفيه

بتتحمل الأوزان الكثيره بدون الهبوط او القرب من الأرض

موفرة  في البنزين على السرعات المنخفضة والمتوسطة

حققت إنتشار قوي  في الشوارع المصرية

قطع غيارها ومراكز الصيانة متوفرة بشكل كبير

سهوله إعادة البيع مع الإحتفاظ بسعرها

عيوبها

عزلها للأصوات الخارجية سيئ جدا وكل الاصوات  مسموعة  داخل الكابينة  بشكل كبير

موتورها عاجز عن تقديم اداء قوي علي السرعات العاليه

بتقدم مواصفات امان جيدة ولكنها بتقتصر علي الفئات الاعلي تجهيزًأ

لا تعتبر افضل قيمه مقابل سعر في فئتها السعريه

فتيسها من نوع CVT اللى بيحتاج للصيانه الدوريه والإهتمام

يعنى من الآخر نيسان قشقاى مناسبه اكثر للعائلات، وده لان الموتور مش الاقوي في الفئة السعرية دى ، بس واسعه جدًا من الداخل

سعر نيسان قشقاى فى مصر

الفئة الاولى  366,000 جنية

الفئة الثانية 402,000 جنية

الفئة الثالثة 430,000 جنية

الفئة الرابعة 462,000 جنية

اتمنى اكون قدمتلكم معلومة مفيدة اشكركم لحسن المتابعة

السلام عليكم ورحمة الله وبركاتة

0 1

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01113276111 - 01201039849
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts