اجابة عن كل الاسئلة الخاصة بتركيب الغاز الطبيعى فى عربيتك والفوائد اللى هتعود عليك من استخدام الغاز

Read Time6 Minute, 24 Second

السلام عليكم ورحمة الله وبركاتة

موضوع جديد هنتكلم فيه عن استخدام الغاز الطبيعى كوقود للسيارات ومميزاتة وعيوبة

هيكون على شكل “س وج”.. كل حاجة عايز تعرفها عن الغاز الطبيعى هنقولها ان شا الله

نبدأ على بركة الله

وقود الغاز الطبيعى شغال في العالم من 100 سنة وفي مصر منذ حوالي 25 سنة و مصر كانت رائدة تطبيق هذه الصناعة في الدول العربية وافريقيا والشرق الأوسط

موجود في العالم تقريباً 28 مليون عربية شغالة بوقود الغاز الطبيعي وحوالي 33 ألف محطة وقود غاز طبيعي

و مصر باعت حوالي 7 مليار متر مكعب من بداية النشاط يعنى تم توفير 7 مليار متر مكعب من وقود البنزين والانتشار حاليا بقا في 21 محافظة

من المتوقع زيادة عدد العربيات اللى بتشتغل بالغاز الطبيعى فى مصر الفترة اللى جاية الى حوالى 300 ألف عربية والدولة شغالة  فى التوسع فى شبكة المحطات اللى حالياً وصلت  187 محطة و72 مركز تحويل على مستوى الجمهورية

اول سؤال واكتر سؤال الناس بتسأله

س . هل الغاز الطبيعي كوقود ممكن يبوظ الموتور على المدى الطويل ويؤثر على عمره؟

الاجابة

ج . لاطبعا  لأنه وقود والخصائص بتاعته فى الاحتراق افضل كمان من البنزين  والمحركات الحديثة بداية من سنة 1990 مصنعة بطرق احدث علشان تتحمل وقود خالى من الرصاص وتتحمل درجات حرارة واحتكاك ومقاومة للتآكل اكثر من المحركات القديمة

السؤال الثانى

س . ايه الأمور التى بتأثر على عمر المحرك ؟

والاجابة بتتلخص فى 3 نقاط

-1 اختيار الزيوت المناسبة Multi grade  والتغيير في المواعيد المناسبة للصيانة الدورية .

-2 الحفاظ علي دورة التبريد علشان الموتور مايسخنش واختيار سائل التبريد المناسب والتنظيف الدائم لفتلر الهواء والريدياتير من الاتربة.

 3- واتباع أسلوب القيادة المعتدل اللى مافيهوش عدوانية يعنى سواقة هادية بدون حرق وكيك داون وتلزق فى ذيل العربية اللى قدامك والكلام اللى كلنا عارفينه

السؤال الثالث

س . هل بتتأثر قدرة المحرك والعزم والكفاءة بوقود الغاز الطبيعي؟

والاجابة

ج . لا لأن وقود الغاز الطبيعي في الحالة الغازية علشان كده عند دخوله المحرك بيشغل حيز من الحجم الكلي مقارنة بالبنزين وبكدة بتنخفض القدرة الحجمية بنسبة لاتزيد عن 5% وبيتم علاج الموضوع ده  بتركيب مقدم الشرارة اللى بيحافظ علي منحني القدرة والعزم زى البنزين تقريبا

بالإضافة إلي أن حقن الغاز الطبيعي إليكترونياً بيحافظ علي الكمية المناسبة من الوقود وبيوفر الاستهلاك وبيدى كفائة فى الآداء مقاربة للبنزين

لكن لو في حالة السرعة القصوي او (تقفيل العداد) زى عربيات السباقات مثلا هتكون النسبة دى واضحة ومفضوحة علشان كده مابيتمش تشغيل المحرك فى الظروف دى بالغاز الطبيعى لكن بنحوله للبنزين والافضل فى الظروف دى العمل بمحرك مصمم اصلا علي وقود الغاز الطبيعي ومابيشتغلش بالبنزين

السؤال الرابع

س . هل تشغيل العربية بالغاز الطبيعى يمنع تشغيلها بالبنزين؟

الاجابة

ج . طبعا لا، لان تجهيزة الغاز الطبيعى بتركب علي المكونات الموجودة فى المحرك يعنى الاتنين جنب بعض البنزين والغاز وللعميل حرية العمل والتغيير بين الوقودين بس لازم بداية تشغيل المحرك تكون بالبنزين وبعد كده يحول على الغاز الطبيعى

السؤال الخامس

س . هل وقود الغاز الطبيعي مضر بالصحة والبيئة وهل هو غير آمن علي الأسرة والمحرك ؟

الاجابة

ج . اكيد لا … لان وقود الغاز الطبيعي ليه خصائص ومنها أنه أخف من الهواء علشان كده  بيتشتت للاعلي في حالة أي تسريب

بالإضافة أنه يستحيل  يشتعل في ظروف الجو الطبيعية او بمعنى ادق (لا يشتعل إلا في حيز مغلق)،

أما فيما يتعلق بالبيئة فوقود الغاز الطبيعي خالي من الرصاص والكبريت علشان كده العادم اللى بيخرج بعد حرق الغاز الطبيعى فى المحرك غير ملوث للبيئة

وكمان وقود الغاز الطبيعي غير سام فالمكونات مصنعة طبقا للمواصفات العالمية في المجال ده

وحتى التركيب بيتم طبقاً لمواصفات قياسية مع الالتزام بالسلامة والصحة المهنية وأقصى معايير الجودة والأمان 

وعلشان الاشاعات اللى بتقول ان الاسطوانة ممكن تنفجر احب اقولكم ان الاسطوانة مقاومة للحرائق والصدمات وبتتحمل ضغوط تتعدي 450 بار ومتصنعة هي وباقى مكونات تجهيزة الغاز الطبيعى طبقاً للمواصفات والمعايير العالمية ISO 

وبيتم فحص الاسطوانة فحص ظاهري بصورة دورية  بإجهزة Ultrasonic  او الموجات فوق الصوتية

وعلى فكرة موضوع القرارات اللى بتتاخد بدون تخطيط هى السبب برضه فى دخول العربيات الكهربية مصر رغم اننا ماعندناش محطات تشحن العربيات دى يعنى العربيات الكهربية نزلت مصر من 2018  وسمحوا باستيرادها 2019 وكمان سمحوا باستيراد المستعمل منها وبقالها سنتين ولحد دلوقتى ماعندناش محطات او مراكز صيانة للعربيات دى

السؤال السادس

س . هل أي عربية ممكن تشتغل بوقود الغاز الطبيعي سواء كانت قديمة أو حديثة ؟

الاجابة

ج . نعم، في حالة العربية القديمة لازم تكون كفائة المحرك لا تقل عن 70% علشان تقدر تشتغل بوقود الغاز الطبيعي.

اما المحركات الحديثة هي فعلا الأفضل للتحويل للغاز الطبيعي لان وقود الغاز الطبيعي يكافئ بنزين 120أوكتان (لو كان موجود في الحقيقة) اي أنه يصلح لتكنولوجيا المحركات والسيارات (GDI) الحديثة والمستقبلية وبيركب مع التجهيزة كمبيوتر خاص بدورة وقود الغاز الطبيعي بيقرا بدقة تغيرات اداء محرك السيارة بوقود البنزين في ظروف التشغيل المختلفة بعد كده بيعمل محاكاه للظروف دى ويضبط العربية بوقود الغاز الطبيعي اوتوماتيك وفى حالة لو كان نظام OBD شغال هيتم ضبط العربية عن طريق الكمبيوتر بدون التدخل اليدوي.

وبتختفي كل المشاكل اللى بتظهر مع البنزين نتيجة قلة جودتة زى الشوائب وانسداد الفلاتر والكربون العازل واللى  بتؤثر سلبياً علي عمر المحرك علشان كده وقود الغاز الطبيعي بيطول عمر المحرك وخاصة المحركات الحديثة

 السؤال السابع

س . هل تجهيزة الغاز الطبيعي هتلغي الشنطة وهل وزن الاسطوانة هيؤثر علي عفشة العربية ؟

الاجابة

ج . لا طبعا أسطوانة الغاز الطبيعي ليها حجم لا يتعدى ⅓ حجم الشنطة وده محسوب على اغلب العربيات اللى مساحة شنطتها 380 لتر وممكن نعوض المساحة اللى نقصت عن طريق تركيب شبكة على السقف أو فك الأسطوانة في فترة السفر او المصيف (لو محتاج للحجم الكلي للشنطة) لان فكها مش صعب ومابياخدش نص ساعة

وكمان وزن الأسطوانة 60 كجم وبتملا تانك البنزين بحوالي 15 لتر بس

يعنى المحصلة النهائية 30 كجم تقريبا زيادة فى الوزن لو قارنتها مع عربية نفس النوع بدون تجهيزة غاز  ووجود الاسطوانة فى الشنطة بيعمل اتزان مع الموتور اللى قدام وبيدى العربية  ثباتاً وإتزاناً إضافي.

السؤال الثامن

س . ايه الاضرار اللى ممكن يسببها الغاز الطبيعى للهواء والانسان والمحرك ؟

الاجابة

ج . استخدام الغاز الطبيعى  بيقلل أول أكسيد الكربون بنسبة كبيرة جداً وده غاز سام ينتج عن عوادم البنزين وبالذات في الإشارات والتكدس المرورى وكمان انخفاض  ثاني أكسيد الكربون CO2  بنسبة كبيرة جداً وده هو المسئول الأساسي عن ظاهرة الأحتباس الحراري وذوبان الجليد وتغيير المناخ والطقس.

بينعدم الرصاص والكبريت من وقود الغاز طبيعي

والرصاص ←طبعا كلنا عارفين انه بيضر صحة الإنسان وبيسبب الأمراض الخبيثة

والكبريت ← بيضر المباني وواجهات المنازل وبيضر الأجزاء الداخلية للمحرك وبيتسبب فى تأكلها وتدمير زيت المحرك

السؤال التاسع

س . هل بتحتاج العربية اللي هنشغلها بوقود الغاز الطبيعي لصيانة خاصة؟

الاجابة

ج . لا طبعا ، مجرد الإلتزام بجدول الصيانة الدورية المعتاد للعربية وتغيير قطع الغيار اللازمة في مواعيدها هيحافظ علي المحرك ويطول عمره

السؤال العاشر

س. هل كل أنواع المحركات ( بنزين – سولار ) ممكن تشتغل بوقود الغاز الطبيعي وكل أنواع المركبات (سيدان – ميكروباص – ميني باص أو اوتوبيس )؟

الاجابه

ج . محركات البنزين فقط وبعد قياس كفاءة المحرك وصلاحيته ممكن تشتغل بوقود الغاز الطبيعي و كل أنواع المركبات سيدان –  ميكروباص –  ميني باص أو اوتوبيس

السؤال الحادى عشر والاخير

س- ايه هى فوائد تشغيل العربية بالغاز الطبيعى؟

الاجابة

بالنسبة للعميل توفير شهري لا يقل عن 1300 جنيه يعنى هتسترد المبلغ اللى دفعته علشان تحول عربيتك للغاز في فتره من 4: 6 شهور.

زيادة فترة التشغيل وعدم التوقف لتموين العربية لان أصبح عندك وقودين فى العربية  (بنزين + غاز طبيعي)

في حالة حدوث عطل في دورة البنزين وده بيحصل كثير بالذات عطل طلمبة البنزين أو انسداد فلتر البنزين برضه هتشتغل العربية بوقود الغاز الطبيعي بدون الحاجة لتعطيلها

مكونات دورة وقود الغاز الطبيعي عمرها طويل ومش هيبقا فى ضغط على مكونات دورة البنزين فهتعيش فترة اطول علشان كده  هتقل تكاليف الصيانة

محطات الغاز مش بتقفل علشان تملا الخزانات زى محطات البنزين ووقت التموين مش بيزيد عن 7 دقائق في حالة أن الإسطوانة فارغة تماماً.

ممكن تنقل مجموعة الغاز الطبيعي من عربية للثانية في خلال 4 ساعات تقريباً يعنى هتستفيد بتغير وتجديد عربيتك فى اى وقت من غير ماتشترى مجموعة تحويل جديدة .

اشكركم لحسن المتابعة

السلام عليكم ورحمة الله وبركاتة

1 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01004003204 - 01008330575
Happy
Happy
0 %
Sad
Sad
0 %
Excited
Excited
100 %
Sleppy
Sleppy
0 %
Angry
Angry
0 %
Surprise
Surprise
0 %

Related posts