طريقة شراء عربية مستعملة او زيرو 7 نصائح لو عملتهم هتشترى عربية محترمة

Read Time7 Minute, 28 Second

السلام عليكم ورحمة الله وبركاتة

موضوع غاية فى الاهمية وهيفيد كل واحد بيفكر يشترى عربية مستعملة فى اى فئة سعرية وللاسف هيفيد كمان اللى بيشترى زيرو

لانك بتستلم عربية تقفيل مصرى او صينى او مسافرة من بعيد على سفن وتيلرات ولازم تتأكد من شوية نقاط علشان ماتاخدش حاجة معيوبة لان ماحدش هينفعك بعد ماتستلم عربيتك … ولا التوكيل شخصيا

هنتكلم عن 7 مواضيع تخلى بالك منهم وانت بتختار العربية اللى هتشتريها وبعد مايستقر اختيارك على عربية حالتها محترمة ممكن ساعتها تاخدها على محطة بنزين او مركز معتمد او التوكيل فى حالة العربيات الحديثة او اللى سعرها معدى لان كشف التوكيل غالى طبعا

هيرفعوا العربية ويعملولك تقرير عن حالتها حوادث وصاج وعفشة وكفائة موتور الى آخره

واحد يسألنى طيب طالما هكشف على العربية فى محطة بنزين ويدونى  تقرير ايه فايدة انى اعرف المعلومات دى ؟

الاجابة … حضرتك لما بتقرر تشترى عربية بتتفرج على 10 عربيات على الاقل وتقارن بين الاسعار والحالات وفى الاخر تقرر تشترى واحدة منهم العربية اللى حضرتك خلاص رسيت عليها هى اللى هترفعها فى محطة بنزين ويتكشف عليها لان الكشف غالى ومش معقول تاخد كل عربية تقابلك تكشف عليها انت كده هتصرف المبلغ اللى معاك على  الكشف !!!

من المحتمل عند شراء عربية مستعملة او زيرو من شخص او معرض تكون اتعرضت لحادثة واللى بيبيعلك مخبى المعلومة دى ، ازاى تقدر تعرف الموضوع ده  بدون استشارة خبير او سمكرى اللى ممكن هو كمان يعمل عليك شغل ويتفق مع صاحب العربية

طيب خلونا فى البداية نتفق ان شراء عربية مستعملة حاليا فى مصر بقا افضل من شراء الزيرو خاصة لو كانت الميزانية محدودة ، شراء المستعمل هيوفرلك مبلغ مش قليل ، وهيجيبلك عربية فئة ومواصفات وصناعة اعلى من الزيرو , وهتتجنب خسارة كبيرة لو حبيت تبيعها غير الزيرو تماما اللى بتخسر مش اقل من 20 الف جنية بمجرد ركبت عليها النمر ، وكتير من النقط الايجابية التانية اللى بتخلى شراء المستعمل افضل من الزيرو

لكن فى المقابل ناس كتير بيشتروا المستعمل وتبدأ رحلة العذاب فى التصليح ومعالجة المشاكل اللى بتظهر بعد الشراء مباشرة ، وده بسبب ان اغلب اللى بيبيع عربيته بيخبى مشاكلها وفى ناس ممكن تخبى مصايب فى عربياتها علشان مايخسروش يعنى ممكن تكون اتقلبت قبل كده او مغيره نص او موتورها مفوت

وبعض انواع الحوادث بتكون مؤثرة على العربية حتى بعد تصليحها وخصوصا الحوادث اللى سببت عوجة فى الشاسية او القوايم

علشان كده ولمصلحتك فى البيع والشراء بلاش تحط ثقتك فى حد وخد إجراءاتك الطبيعية وامسح الابتسامة وقلب الحاجة اللى هتشتريها كويس جدا علشان بعد الشراء البايع هيقفل تليفونه وماحدش هينفعك …

هقدملك 7 نصائح تاخد بالك منهم واضمنلك بنسبة 90% انك لو نفذت الكلام ده هتعرف تشترى عربية كويسة مافيهاش حوادث، وتوفر عليك مشاكل ومصاريف كتير لكن زى ماقلت فى الاول انت بتنقى عربية من مجموعة عربيات معروضة عليك ولازم بعد ماتفلتر العربيات دى تاخد العربية المحترمة فيهم وترفعها فى محطة بنزين او مركز معتمد او التوكيل علشان فى صنايعية اساتذة فى الغش والاجهزة بس هى اللى بتكشفهم      

اول نقطة لازم تاخد بالك منها هى تفاوت لون الدهان واللمعه  

دهان العربية او البوية من الحاجات الاساسية اللى بتكشف تعرضها لحادثة، علشان كده لازم تفحص الدهان بدقة وفى نور الشمس ومن كذا زاوية واوعى تشترى عربية بالليل دايما روح اتفرج على العربية بالنهار.

لو بصيت على دهان عربية من بعيد او بشكل مباشر مش هتكتشف اى فروق ، علشان كده لازم تركز على انعكاسات الضوء على البوية .

بمعنى ماتبصش مباشرة للدهان لكن بص من الجوانب وشوف انعكاسات الضوء عليه ولازم تكون الاضائة قوية ، الطريقة دى هى اللى هتبينلك اى فروق فى اللون او تموجات بسبب تسييل وتركيز البوية اثناء الرش .

افحص جوانب الابواب من الداخل وقارن لونها مع لون الجسم الخارجى ودور على اى آثار دهان جديد او طرطشة على الفرش او موكيت الارضية او اطراف وكاوتش الزجاج  

تانى نقطة لازم الابواب والكبوت والشنطة يكونوا بيقفلوا ويفتحوا بسلاسة

لما تكون الابواب والكبوت او غطا المحرك والشنطة الخلفية مقفولين المفروض انهم يكونوا مقفولين كويس والفرق بين الباب مثلا والقايم او بين الباب والباب اللى جنبه فرق ثابت من فوق لتحت يعنى ماينفعش تلاقى الفرق مثلا 5 مللى فى الباب من فوق ومن تحت مفارق 10 مللى

ماينفعش يكون الباب او الشنطة او الكبوت بيقفل نص قفلة او مفارق من ناحية وقريب من ناحية تانية ، ولو حسيت بفرق غير متساوى او اكبر من الطبيعى او حسيت بميل او مش بيقفل صح فده دليل على ان العربية عاملة حادثة ومش عارفين يظبطوا الفروقات دى.

جرب تفتح وتقفل الابواب والشنطة والكبوت اكثر من مره علشان تتاكد من الكلام ده ، ولو مش بتقفل وتفتح بسلاسة ابعد عن العربية ولو ببلاش .

كمان لازم تبص كويس على الاكصدام الامامى والخلفى ولازم يكون راكب كويس جدا والفروقات بينه وبين صاج الرفارف والكبوت زى بعض ومافيش ميل ولا لحامات ولو لاقيت غير كده تبقا العربية مخبوطة فى الاكصدام  

ثالث نقطة هى فحص الجنوط والكاوتش واجهزة التعليق او العفشة

الموضوع ده فى غاية الاهمية لان الكاوتش ممكن يكشف لو كانت العربية عملت حادثة كبيرة لان اى ضرر فى قاعدة العجلات او عوجة فى الشاسية تأثيره هيبان على الكاوتش.

ومن الآخر اى ضرر فى قاعدة العجلات او الشاسية معناه ان العربية دى بقت كتلة معدنية من المشاكل.

علشان كده لازم تفحص الكاوتش بدقة وارفع العربية على كوريك وحرك العجل او بص على الكاوتش وبعدين حركها عجلة قدام وبص على باقى الكاوتش لو لاقيت الكاوتش متاكل من جنب بدرجة كبيرة  اكتر من الجنب التانى فدى اشارة يامارد على وجود عيب فى قاعدة العجلات او فردة الشاسية.

بص تحت العربية على اجهزة التعليق سوست ومساعدين وكبالن ومقصات ومسامير وشوف لو حاجة متغيرة او شكلها جديد  

رابع نقطة خاصة بالعربيات الزيرو او عربيات المعاقين وهى ريحة الرطوبة

العربيات المستوردة من الخارج سواء جديدة او مستعملة ممكن تكون تعرضت للغرق فى المياه سواء جايبينها من دولة فيها سيول او فيضانات او وقعت فى البحر اثناء تحميلها ودى بتبقا بالنسبة للمستوردين مصلحة سريعة ولقمه عيش سهله لان البلاد اللى بيحصل فيها فيضانات او سيول كل العربيات الغرقانة بيعرضوها فى مزاد وممكن عربية زيرو لو ثمنها 30 الف دولار فى المزاد تتباع بالف دولار

وعلشان تكتشف حاجة زى كده لازم تفحص اضائة  لوحة القيادة فى التابلوه  والانوار الداخلية ،والكشافات والفوانيس والنوافذ الكهربائية وغيرها من التجهيزات الكهربائية وحاول تجربها كتير وافتحها واقفلها على قد ماتقدر ، واى خلل فى الاضائة او تلميس او قافلة او رعشة او لاقيت الكشافات مشبره او فيها نقط مياه . او لاحظت وجود فواحات كتيرة جوا العربية ، فده يعتبر تغطية لريحة الرطوبة بسبب المياه وطبعا عربية زى دى ابعد عنها فورا    

خامس نقطة هى الشروخ فى الزجاج الامامى والخلفى

افحص الزجاج الأمامي والخلفى بدقة ولو لاقيت شروخ بدون نقر او خبطات بمعنى انها شروخ مش بسبب زلطة مثلا فى الطريق تبقا العربية دى عملت حادثة ضغطت على الزجاج وسببت الشروخ دى ودايما هتلاقى الشروخ دى قريبة من الاطار الخارجى للزجاج . وحتى لو كانت الشروخ دى عادية ماتقبلش انك تشترى العربية بالوضع ده وخلى المالك يغير الزجاج على حسابه لان اى شرخ ولو بسيط هيكبر مع الوقت وهتضطر تغير الزجاج عاجلا او آجلا  

سادس نقطة هى الكشافات والفوانيس الامامية والخلفية

علامات التقدم بالعمر بتظهر على زجاج الفوانيس والكشافات خاصة الأمامية ، وبيبان الموضوع ده على شكل ضباب او سنفرة او بيتقال عليها فوانيس مغبشة.

وبكل بساطة، قارن بين المصابيح الأمامية أو الخلفية، ولو لاقيت اختلاف في نقاوة الزجاج  ف ده دليل على تغيير الكشافات  ، وعادة الموضوع ده بيتم بسبب التعرض لحادثة  يعنى ماحدش بيكلف نفسه ويغير كشافات العربية ويدفعله كام الف علشان معاه فلوس زياده .

لما تلاقى الكلام ده افتح غطاء المحرك وافحص قواعد المصابيح والصاج اللى حواليها  علشان تتاكد من تعرض العربية لحادثة.  

النقطة السابعة والاخيرة هى الاصوات اللى هتسمعها وانت سايق العربية

ماتشتريش عربية مستعملة بالذات قبل ماتقعد وتسوق اكتر من مره ، وركز جدا فى الاصوات اللى هتسمعها ، افتح الشبابيك وامشى على طرق مفتوحة وطرق فيها مطبات وامشى جنب سور او حواجز علشان الصوت يخبط فى الحاجز ويردلك واى صوت احتكاك غير طبيعى هتسمعه او طقطقة او واننه معناه ان فى تآكل فى قاعدة العجلات او رمان بلى خشن او كوبلن او مقص بايظ الى آخره.

وخلى بالك من صوت المحرك واى صوت احتكاك داخل المحرك يبقا فى مشكلة كبيرة ممكن تكون سبايك او بساتم الى اخره . وجرب صندوق التروس المانيوال او الاوتوماتيك وجرب النقلات كلها كذا مره  وهاته على الدى وارجع للآر والان وكرر الموضوع كتير ولاحظ لو فى عضه فى الفتيس المانيوال او لو الاوتوماتيك مش بينفذ او بيتاخر شوية  

جرب عجلة القيادة وحركها يمين وشمال للآخر واسمع صوت طلمبة الباور ولو صوتها عالى تبقا لازم تتغير ولو فى صوت طقطقة تبقا مشكلة عفشة جرب الفرامل واتاكد انها بتوقف العربية فى مكانها والاربع عجلات بيمسكوا كويس

اى حاجة من اللى انا قلتها لو طالع منها صوت غريب او مهنجة او مش شغالة … ماتسمعش اى اعذار من صاحب العربية لانك لو خدتها كده هتصرف عليك كتير وممكن تكون مشكلة كبيرة حلها تغيير موتور مثلا او فتيس

واوعى تقول هشتريها بسعر رخيص واشدها لان خبرتك ماتسمحلكش وماتعرفش فيها ايه ؟

وقطع غيارها ومصنعياتها كام ؟

وكتير قبلك غرقوا فى البحر ده !!!

مع احترامى لخبرة الجميع فى مجال السيارات بس اللى ممكن يعمل كده لازم يكون ميكانيكى او سمكرى شغال فى شد العربيات من صغره وكتير منهم بيتضحك عليه وبعد مايكسب فى كام عربية تيجى عربية تاخد اللى وراه واللى قدامه

نصيحة اشترى عربية حالتها ممتاذة علشان ماتكرهش نفسك وماتعتمدش على الكشف بالعين المجردة ولازم تكشف عليها بالاجهزة فى محطات البنزين او المراكز المعتمدة والتوكيلات

وفى النهاية اتمنى اكون قدمتلكم معلومة مفيدة

اشكركم لحسن المتابعة

السلام عليكم ورحمة الله وبركاته

0 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01113276111 - 01201039849
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts