24 نصيحة هتوفرلك استهلاك البنزين فى عربيتك

Read Time12 Second

السلام عليكم ورحمة الله وبركاتة

بعد الزيادة في أسعار المواد البترولية، ، يبحث الكثير من مالكي السيارات عن طرق مناسبة وذكية تساعدهم على توفير استهلاك الوقود.

فى الموضوع الصغير ده 24 نصيحة هتساعدك على توفير معدلات استهلاك البنزين والزيت بشكل يومي وكمان تحافظ على الموتور .

1- اتأكد من سلامة العربية وحافظ على الصيانات بشكل دورى علشان تبعد عن سخونية المحرك، لأن الإهمال والمحرك اللى بيسخن بيزود من استهلاك البنزين بنسبة 10%.

2- حافظ على تغيير الزيت بانتظام، لان الزيت لو خفت لزوجته .. الاحتكاك بين اجزاء المحرك هيزيد … وهيستهلك  3% بنزين أكثر.

3- الكاوتش اللى مريح هيستهلك 70% بنزين أكثر، وعدم ضبط الزوايا هيستهلك 10% زيادة عن الطبيعى.

4- ابعد عن المشى فى الطرق الرملية والطينية   لأن استهلاك البنزين بيرتفع كل ما تزيد المقاومة.

5- كل 100 كجم زيادة في شنطة العربية  بتقلل  نص كيلومتر من المسافة التي بتقطعها العربية بكل لتر بنزين، والاستهلاك هيزيد اكثر لو كانت الحمولات على شبكة تحميل فوق السقف

6- ماتسخنش العربية كتير ، بس اتحرك فى الاول بسرعة منخفضة لحد ما مؤشر الحرارة يتحرك لوضعه الطبيعى ، وماتستمرش على السرعة المنخفضة دى كتير لان المشى على سرعات منخفضة بيزود استهلاك البنزين.

7- ماتحرقش على الغيار بمعنى ان النقلات تتم فى ميعادها ومش لازم تنقل لما تسمع الموتور بيصوت تحت رجلك علشان زيادة عدد اللفات بيسخن الموتور وبيقلل من عمره وبيخلى رزاز الزيت يلمس شمعة البوجيهات وممكن يعمل عازل  ويبرجل العربية  فمثلا لو سوقت بسرعة 60 كم / ساعة على الغيار الثالث  هترفع معدل استهلاك البنزين حوالى 25٪ عن لو نقلت للغيار الرابع فخليك دايما عند النقلات الطبيعية الغيار الاول لحد ما العربية تتحرك وسرعتها تبقا 10 كم/س وبعدها انقل على الغيار الثانى لحد ال 30 كم/س وبعدين انقل على الثالث وعند ال 50 كم/س انقل على الرابع اللى معاك لحد ال 90 كم/س وبعده الغيار الخامس اللى مكمل معاك وماتزودش عن 120 كم/س علشان سلامتك

8- الطريق السريع طبعا أفضل لخفض استهلاك البنزين، وحاول تبعد عن الإشارات والاختناقات المرورية، والغريب انك مثلا لو طلعت الدائرى والطريق كان ماشى هتلاقى نفسك استهلكت بنزين اقل من حركتك داخل المدينة مع ان الدائرى اطول  

9- خلى بالك انك كل ماتزود السرعة هتستهلك كميات أكبر من الوقود، والدليل على الكلام ده ابحاث مؤسسة «كونسيومر ريبورتس» اللى اثبتت أن السواقة بسرعة 105 كم/ الساعة، بدلا من 121 كم/ الساعة هتوفرلك بنزين يكفى من خمسة إلى 8.5 كم زيادة في كل 3.7 لتر بنزين.

10- ابعد عن السرعة المفاجئ او الطلعة الامريكانى او باللغة الخليجى التفحيط اللى احنا بنسميه فى العربيات الاوتوماتيك الكيك داون ، كل ماتضغط  بقوة على دواسة البنزين كل ما هيتم ضخ كمية أكبر من البنزين،

11- خلى سواقتك دايما ناعمة وزود السرعة ببطء تدريجيا وبرضه تجنب التوقف المفاجئ، وماتحاولش تسوق وانت لازق فى ذيل العربية اللى قدامك لان ده «يُعتبر أسوأ أنواع السواقة»، فالطريقة السليمة الهادية فى السواقة بتوفر في استهلاك الوقود بنسبة 20% مقارنة بالسواقة العدوانية،

12- استخدم مثبت السرعة لو متوفر فى عربيتك في الرحلات الطويلة وعلى الطرق المستوية.

13- تشغيل التكييف يؤدي إلى استهلاك إضافي للوقود بنسبة 20% في المدينة وبنسبة 3% على الطرق السريعة، فيفضل فتح الزجاج داخل المدينة وتشغيل التكييف في الطرق السريعة.

14- روح محطة البنزين لما يكون المؤشر بين النصف والثلث، علشان تحافظ على انتظام كمية البنزين اللى رايحة للمحرك لان لو كمية البنزين قلت كفائة الموتور هتقل وهيستهلك بنزين اكثر

15- أنسب وقت تمون عربيتك فيه لما تكون الأرض باردة يعنى  من الفجر لحد 9 صباحا علشان بتكون كثافة الوقود عالية، وبلاش تمون عربيتك بالليل علشان الارض والخزانات اللى فى محطة البنزين بتبقا مخزنة حرارة الشمس و بتبقى سخنة بالليل وده بيقلل كثافة الوقود

16- وانت بتمون خلى سرعة المسدس بطيئة او روح محطة بنزين الطلمبات بتاعتها بطيئة ، علشان تقل الأبخرة التي تتكون أثناء الضخ، وماتملاش خزان العربية لحد آخره لان البنزين الزيادة بيرجع فى المسدس تانى بس حضرتك للاسف خلاص حاسبت عليه

17- ماتسيبش محرك العربية  شغال في الاشارات و الانتظار أو الاختناقات المرورية، خاصة أن إعادة تشغيل المحرك مابيستهلكش كمية كبيرة من البنزين، والموضوع ده هيوفرلك فى استهلاك البنزين بنسبة لا تقل عن 12%، اثبتت دراسات وابحاث كتير ان موتور العربية ال 1600 سى سى بيحرق كمية بنزين كافية انك تسوق 800 متر في كل دقيقة انتظار، يعنى لو وقفت فى اشارة 5 دقائق هيحرقوا بنزين يمشيك 4 كم ودى الميزة اللى فى العربيات الهجينة  الهايبرد اللى فيها خاصية التوقف عن ضخ البنزين كل ما سرعة دوران عجلاتها تقل

18- حاول تجمع عدد من المشاوير في وقت واحد وتعمل مشاويرك بعيد عن فترات الزحام.

19- لو سوقت عربيتك عكس اتجاه الريح (لو رياح مثلا بسرعة 30 كم/ ساعة) هيزيد استهلاك البنزين بمقدار 6%، والسواقة على المطالع هتزود استهلاك البنزين بمقدار 7%.  

20- لما تيجى تشترى عربية جديدة قارن بين معدل استهلاك الوقود للعربيات اللى فى نفس الفئة السعرية، واختار اقلهم … مع الوضع في الاعتبار أن كبر حجم العربية وسعة المحرك الكبيرة  هتقلل من الاقتصاد فى استهلاك الوقود يعنى من الاخر لو بتدور على عربية كبيرة وواسعة وسعة المحرك كبيرة ماتسألش عن التوفير فى استهلاك الوقود

21- استخدام أنواع جيدة من البنزين على الرغم من ارتفاع أسعارها نسبيا، الا انها بتدى معدلات احتراق أعلى وده بيخلى فاتورة الوقود اقل، وممكن تشترى العربيات اللي بتعتمد على الغاز الطبيعي او تركيب تجهيزة غاز طبيعى

22- لو كان فلتر الهواء اوالشمعات البوجيهات مش نظيفة ، هتلاقى العربية  بتستهلك 10% زيادة فى الوقود ، وممكن تتضاعف النسبة إلى 20 % أو 30 % في حالات الازدحام والسرعات البطيئة.

23- استخدام الجراج والظل لركن عربيتك شئ مهم  وهيخليك توفر وماتشغلش التكييف مع بداية تشغيل المحرك

24- بلاش تستخدم مضخم الصوت، أو أي أجهزة إضافية غير الكاسيت، لأنها بتستهلك كهرباء أكثر، وبالتالي بنزين أكثر.

فى النهاية اتمنى اكون قدمتلكم معلومة مفيدة

اشكركم لحسن المتابعة

السلام عليكم ورحمة الله وبركاتة

1 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01004003204 - 01008330575
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts