اعرف عيوب عفشة عربيتك من الاصوات والاهتزاز وحدد سبب العطل بنفسك ومين يصلحه وهل ممكن يستنى ولا خطر

Read Time3 Second

السلام عليكم ورحمة الله وبركاتة

هتكلم بسرعة عن موضوع مهم جدا وهحاول اختصر ان شاء الله على قد ماقدر

موضوعنا النهاردة ازاى تعرف عيوب عفشة عربيتك وانت سايق من الاصوات والاهتزاز وشوية حاجات سهلة جدا كلنا نعرف نميزها

وهدلك على حل كل مشكلة في خلال ٣ دقايق بالظبط

اكيد طبعا مش هقول لحضرتك انزل تحت العربية صلحها لكن هقولك تروح فين علشان تحل المشكلة وهل المشكلة خطيرة ولازم تصلحها فورا ولا ممكن تصبر عليها شوية ومش هندخل فى تفاصيل ميكانيكية كتير يعنى هديلك الزتونة من الاخر.. المهم تبقا عارف عربيتك فيها ايه

الله طب وهيفرق فى ايه انى اعرف المشكلة مادام مش هصلحها بنفسى

لا يافندم …. معرفة المشكلة دى حاجة مهمة جدا لسببين

السبب الاولانى علشان فى مشاكل ممكن يتصبر عليها شوية لو مش معاك فلوس دلوقتى وفى حاجات تانية لما تحصل لازم تركن فورا وتدور على عفشجى او ميكانيكى لانك لو اتحركت بالعربية بالعطل ده تبقا بتغامر بحياتك وحياة اللى معاك

السبب التانى ان معرفة عيب او عطل فى العفشة هيوفر عليك اشتغالات كتير جدا من صنايعية هيقلبوك ويخترعوا اعطال مش موجودة وممكن يخلوك تشترى قطعة غيار مش محتاجها وماتركبش فى العربية اصلا !!! ويوروك قطعة بايظة فاكينها من عربية تانية وياخدوا الجديدة اللى حضرتك اشتريتها يركبوها لعميل جديد يشتغلوه وهكذا

ماحدش يقولى الموضوع ده مابيحصلش لانه حصل مع كل الناس ومش عفشة وميكانيكا وكهربا بس لا ده الموضوع ده بيحصل فى كل المهن والوظائف دكاترة ومهندسين ومحامين وسباكين الى اخره

مين فينا ماراحش لدكتور واشتغله وقلبه وعمله فيلم  ؟؟ 

مين فينا مابيروحش لدكتور واتنين وتلاتة علشان مش مطمن وقلقان وماياخدش الدواء الا لما اتنين دكاترة يقولوا نفس الكلام

مين فينا مش بيقف جنب الراجل اللى بيزود الكاوتش ويقعد يبص على ايدية علشان متأكد 90% انه هيخرم الكاوتش علشان يفتح فى شغل جديد

القصص كتيرة جدا وقلة الضمير متوفرة وموجودة فى كل المهن وكل البلاد ولو هنتكلم فى الحكاية دى عاوزين حلقة مخصوص بس ده مش موضوعنا

هقول 14 موقف لو حصلك يبقا مظهر من مظاهر الاعطال

1- لو لقيت هزة أو رعشة فى العربية قبل سرعة 100 كم .. معنى الكلام ده ان العربية عندك عايزة ترصيص أمامى عند أي حد بتاع ضبط زوايا  والعيب ده ممكن يتصبر عليه شوية بس لو بتسافر كتير انصحك تعمله قبل السفر

2- لو لقيت هزة فى العربية بعد سرعة 100 لـ 120 كم معنى كده ان العربية عايزة ترصيص خلفى عند أي حد بتاع ضبط زوايا ونفس الكلام برضه مش لازم تروح تحل المشكلة فى وقتها وممكن تمشى على كده شوية بس مش كتير

3- لو لقيت رعشة مع دواسة الفرامل والعربية بتحدف منك يمين او شمال حدفة بسيطة او صوت صفارة بتروح وتيجى فى نفس دوسة الفرامل معنى الكلام ده ان الطنابير فيها عالي و واطي والطنابير للى مايعرفش هى الاسطوانة اللى بتشوفها لو بصيت على الجنط  المفروض ان تيل الفرامل بيمسكها علشان العربية تقف وبكدة هي عايزة تتصنفر أو التيل عايز يتبرد أو يتغير خالص وده اللي أنا بفضله والموضوع ده لازم تعمله عند حد بتاع عفشة او ميكانيكى ولازم يتعمل فى اقرب وقت علشان مايدمرش الطنابير وتضطر تدفع اكثر

4- لو حسيت من فترة للتانية بدواسة الفرامل أحياناّ بتبقي محجرة تحت رجلك معنى كده ان السيرفو بدأ يودع ولازم يتغير والسيرفو ده هو جهاز تقوية الفرامل اللى حضرتك لما بتدوس فرامل ضغطة ضعيفة السيرفو بيقوى الضغطة دى جدا علشان يضغط على المكبس الرئيسى اللى هو ماستر الفرامل اللى بيضغط الزيت علشان يفرمل العربية وده ماينفعش تصبر عليه ولازم تتحرك على ميكانيكى فورا يغيرهولك لان بعد شوية الدواسة هتبقا حجر والعربية مش هتقف حتى لو جبت ارنولد شخصيا يدوسلك فرامل

5- لو لقيت تخبيط وترزيع في الحفر والمطبات معنى الكلام ده ان العربية عايزة جلب مقصات أو بيض إتياش ومنصحش إنك تستني عليها كتير لان طالما طلعلها صوت يبقا خلاص جابت اخرها ولازم تتغير والصوت ده لازم تعتبره جرس انذار

6- لو لقيت رجرجة مع الطلعة وممكن ريحة كاوتش محروق لو أنت عربيتك مانيوال معنى كده ان العربية عايزة إسطوانة دبرياج ومنصحش برضو انك تستني عليها علشان الموضوع ميزيدش وماتعملهاش معاك فى طريق مقطوع وياسلام بقا لو يوم سبت بالليل وصابح الاحد ومافيش صنايعية  اعتقد الحل الوحيد فى موقف زى ده انك تكلم الحاجة وتشوف زعلتها فى ايه وتصالحها وتخليها تدعيلك وربنا يحفظ امهاتكم  جميعا ويديهم الصحة وطول العمر ويرحم اللى فارقونا

7- لو حسيت بخبطة مع الغيار لو أنت عربيتك أوتوماتيك معنى كده ان العربية عايزة قواعد موتور والموضوع ده هيبان معاك بدرى عن كده كمان على شكل تزنيده فى طلعة العربية بمعنى العربية بتعتل وهى طالعة وممكن تمشى عليها شوية لحد ما ربك يكرم بس تخليها فى دماغك

8- لو لقيت الدركسيون مبيردش لوضعه الطبيعى بعد الملفات أو بيرد بس ببطئ ومحتاجك تساعد معاه وترده بنفسك يبقي العربية عايزة عامود صليبة وده لازم يتعمل فى اقرب وقت

9- لو لقيت طرقعة مع لف عجلة القيادة  اوالطارة والعربية واقفة معنى الكلام ده ان الإسكاترا بدأت تودع ولازم تتحشي أو تتغير فى اقرب وقت عاشرا  لو لقيت طرقعة أو طقطقة مع الملفات يبقي العربية عايزة كبالن ومنصحش برضو إنك تستني عليها كتير بدل ماتعملها معاك على سرعة لاقدر الله او فى مكان مقطوع والبللى يفرط والعربية تحلف ماهى ماشية وتضطر تدور على حد يقطرك لو الفتيس مانيوال او تدور على ونش لو الفتيس اوتوماتيك وتدفع الف جنية نقل ده غير ثمن الكوبلن والمصنعية

11- لو لقيت طرقعة فى الغيارات مع هزة أو دبة معنى كده ان العربية عايزة كبالن داخلية ودى لازم تغيرها فى اقرب وقت  

12- لو حسيت بتزييق مع لف عجلة القيادة  وتقل فيها تبقي العربية عايزة بطاحات وبرضه لازم تغيرها فى اقرب وقت  

13- لو حسيت بسخونية دايماّ فى العجل يبقي بنسبة كبيرة هتلاقي إن تيل الفرامل قافش ومبيردش لوضعه الطبيعي وطبعا لازم تروح لميكانيكى فورا علشان ماتدفعش اكثر بعدين

14- لو سمعت صوت عالى من بطن العربية أو من ورا مع سحب ضعيف والعربية بتسخن يبقي غالباّ ده شكمان مسدود وعلشان تتاكد شغل عربيتك وشوف الدخان الخارج منه وسد الشكمان بايدك علشان تتاكد انه مسدود ولازم تتحرك على حد بتاع شكمانات فورا

وده كان آخر موقف معانا

اغلب المشاكل اللى قلتها حلها عند الميكانيكى وخلى بالك وانت بتصلح عربيتك عند ميكانيكى او عفشجى ماتعملش بيه ويجيبلك كرسى وشاى وتسيبه يشتغل وانت مش موجود او تسيبله العربية والمفتاح وتديلة رقم تليفونك ولما يخلص يكلمك

انت كده بتقولة اسرقنى شكرا

لما تكون عند ميكانيكى لازم تكون عينيك فى وسط راسك شايف اللى رايح واللى جاى اللى بيتفك واللى بيركب ولازم تخليه يركب كل المسامير اللى فكها لان اغلب الصنايعية بيفك 50 مسمار ويركب 20 ولو سألته الحاجة اللى ماركبتش دى ايه هيقولك زيادات او مش هتأثر فى حاجة

ماتسمحش بأى تقصير وكل اللى اتفك لازم يركب ويركب صح وتاخد بالك من الصنايعى وهو شغال مايدوسش على كوعة يكسرها او يربط مسمار يقطمه

من الآخر امسح الابتسامة خالص وخليك زبون غلس واسأل فى كل حاجة وزى مابقول دايما للصنايعية الخواجة مابيغلطش ومستحيل يعمل حاجة زيادة او ملهاش لازمة حتى الوردة اللى فى المسمار زى مافكيتها تركبها

اتمنى يكون الموضوع مفيد اشكركم لحسن المتابعة

السلام عليكم ورحمة الله وبركاتة

0 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01004003204 - 01008330575
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts