احسن عربية زيرو بسعر من 130 الف الى 175 الف جنية لاول مره مقارنة بالدرجات بين 7 عربيات

Read Time5 Minute, 9 Second

السلام عليكم ورحمة الله وبركاتة مرحبا بكم اصدقائى الاعزاء فى موضوع جديد عبارة عن مقارنة بالدرجات بين مجموعة عربيات زى ماطلبتم وده هو الجزء الثانى فى الجزء الاول قارنت بين 5 عربيات فى فئة سعرية من 200 الى 210 الف جنية

الموضوع ده مش دعوه للشراء فى الوقت الحالى لكن دى مجرد مقارنة بين مجموعة عربيات فى فئة سعرية متقاربة

وكل اللى بيسألنى عن الشراء بقوله انتظر لان التخفيضات بدأت من ديسمبر اللى فات ولسه فى تخفيضات كبيرة جاية ان شاء الله

وعلشان نعرف احسن عربية فى حدود السعر من 130 الف  اللى هو اول سعر ممكن تركب بيه عربية زيرو فى مصر لحد 175 الف جنية المقارنة حولتها لدرجات يعنى مثلا الاوبشنات التافهة هنديها 10 درجات زي طارة جلد مساحات خلفية سبويلر خلفى كل الكلام الغير مؤثر على كفائة العربية واللى ممكن نستغنى عنه وحاجات تانية كتير اغلب الناس اصلا مش بيعرفوا انها عندهم فى العربية الا بالصدفة وممكن يتفاجئ بيها وهو بيبيع عربيته

اما الاوبشنز المهمه خليتها ب 20 درجة زي مثلا فرش الكراسى الجلد او كمبيوتر الرحلات او عجلة القيادة المالتى فانكشنز او وسائد هوائية يعنى من الاخر الاوبشنز الغالية اللى وجودها هيعمل فرق قيمتها بعشرين درجة بالنسبة للاساسيات المهمة جدا واللى بتأثر على كفائة وامان العربية زى قدرة وعزم المحرك والتسارع واستهلاك البنزين الى اخره هحط ال 10 درجات  لكل رقم زيادة عن اقل عربية فيهم بمعنى ان اقل عربية من العربيات اللى فى المقارنة  مثلا قدرتها  86 حصان هتاخد في التقييم صفر والاعلى منها على كل حصان زيادة هتاخد 10 فلو مثلا العربية اللى بعدها 100 حصان هنطرح 100 – 86 =14 ولان القدرة من الامكانيات المهمه جدا هنضرب 14 * 10 يعنى 140 درجة زيادة

نفس الكلام هيحصل مع فرق السعر لانى المره دى جايب عربيات بفرق سعر كبير وعلشان المقارنة تكون عادلة فرق السعر هيتاخد فى الحسبان بمعنى ان اعلى عربية فيهم سعرها مثلا 175 الف هتاخد درجة صفر فى المقارنة وكل عربية اقل منها فى السعر هتاخد على كل الف جنية 10 درجات وحسبناهم ليه  10 درجات علشان ال1000 جنية دى عادة بتكون سعر واحدة من الاوبشنات التافهة اللى ميزناها ب10 درجات فى بداية كلامنا يعنى مثلا لو العربية اللى بعدها سعرها 150 الف جنية يبقا الفرق 25 الف جنية هنضربهم فى 10 يعنى العربية الارخص اللى سعرها 150 الف هتاخد 250 درجة زيادة فى التقييم

وجود نظام كامل من عدمه هيكون تقييمة  100 درجة زى مثلا ايه بى اس او اي بي دى او نظام الركن الذكى الى اخره

النظام او الاوبشن الموجود في كل العربيات اللى بنقارن بينهم زى اللى مش موجود بالضبط  مش هنحط عليه درجات لانه مش هيفرق بينهم في التقييم

علشان فرق السعر كبير شوية هتلاقى ف بعض الانواع فئتين زى مثلا اللانوس فيها فئتين واحدة ب 166 الف والتانية الاعلى ب 171 الف فى الحالة دى هناخد الفئة الاعلى اللى ب 171 ونفس الكلام فى اللادا جرانتا نازلة بفئتين واحدة ب 155 الف والتانية الاعلى ب 175 الف وهناخد برضه الفئة الاعلى اللى ب 175

فى نهاية المقارنة هخصم 30% من درجة العربيات الصينى لمجرد انها صينى وماحدش من المدافعين عن العربيات الصينى  يزعل و يقولى بتعمل كده ليه لان انت شخصيا لما بتروح تشترى قطعة غيار لعربيتك بتبعد عن الصينى ودى حاجة مش من تاليفى وكل الناس عارفين الموضوع  ده لو جبت قطعة غيار كورى بتعيش  اضعاف الصينى يعنى ده مش سر ان الصناعة الصينى تعبانة وخاماتها سيئة او ان اللى بيجيلنا مصر بالذات صناعة سيئة وده بسبب المستوردين لانى شوفت منتجات صينى محترمة فى السعودية وغيرها من الدول لكن احنا بنتكلم دلوقتى عن مصر وعن المستورد المصرى لو مش مقتنع بكلامى اسأل تجار قطع الغيار ومراكز الصيانة والميكانيكية اسال سواقين التاكسى قولهم اجيب قطعة غيار كورى ولا تايوانى ولا صينى الصينى اللى بينزل مصر كله تعبان وعمره قصير وانظمة الامان فيه منظر على الفاضى وسعر اعادة البيع ضايع مع كامل احترامى لكل اصحاب العربيات الصينى

وفى الاول والاخر ده رأيى الشخصى اللى عاوز ياخد بيه اهلا وسهلا مش عاوز براحته   وفى آخر الفيديو وبعد مانستعرض المواصفات والكماليات لكل عربية هجمع الدرجات وهقول كل عربية جابت كام درجة وهرتب العربيات مرتين

مره بدون خصم ال 30% بتاعة الصينى علشان نعرف افضل عربيات للناس اللى مش فارق معاها الصناعة الصينية

والمرة التانية الترتيب بعد خصم 30% للناس اللى  بتقلق وبتبعد عن الصينى

وهقولكم رايى المتواضع الغلبان لافضل عربية مواصفات وامكانيات فى حدود السعر ده اللى هو من 130 الى 175 الف جنية

فى الفئة السعرية دى من 130 الى 175 الف هنقابل 9 انواع عربيات وهنقارن بين 7 منهم بس فى كل حاجة لحد مانعرف مين الافضل

المقارنة هتكون بين 7 عربيات بس لان فى عربيتين فان  طلعتهم من المقارنة لاننا بنتكلم عن العربيات الملاكى بس

هعمل بينهم مقارنة فى موضوع مخصوص لعربيات اكل العيش العربيتين دول هما سوزوكى فان ب 130 الف و شيفرولية  (إن 300)  ب 175 الف

السبع عربيات اللى معانا فى المقارنة هم

رينو لوجان فئة اولى مانيوال موديل 2020 بسعر 165 الف جنية

لادا جرانتا فيس ليفت الفئة الثانية  اوتوماتيك موديل 2020 بسعر 175 الف جنية

شيفرولية لانوس الفئة الثانية  مانيوال موديل 2020 بسعر 171 الف جنية

سوزوكى التو مانيوال موديل 2020 بسعر 135 الف جنية

شيرى انفى مانيوال موديل 2019 بسعر  175 الف جنية

شيرى اريزو 5 فئة اولى بيز لاين مانيوال موديل 2020 بسعر 172 الف جنية

بى واى دى اف 3 مانيوال موديل 2020 بسعر 173 الف جنية

وبكده نكون انتهينا من تقييم السبعة انواع اللى معانا

وكان ترتيب السيارات من حيث المواصفات والامكانيات وبدون خصم ال 30% من السيارات الصينى كالاتى :

شيرى اريزو5  –  بى واى دى اف 3 –  شيرى انفى –  لادا جرانتا – شيفرولية لانوس  –  رينو لوجان  – والسوزوكى التو فى المركز الاخير بفرق كبير

اما لو حبينا نعمل الصح ونحط السيارات الصينى فى مكانها المناسب ونخصم 30% على الاقل من تقييمها  خامات سيئة وعمر قصير وعيوب صناعة الى اخره هيكون

الترتيب كالاتى:

لادا جرانتا  –  شيفرولية لانوس  –  رينو لوجان –  شيرى اريزو 5 –  بى واى دى اف 3 – شيرى انفى – وبرضه فى المركز الاخير سوزوكى التو يعنى

السوزوكى التو فاشلة فى كل الاحوال قبل الخصم زى بعد الخصم وامكانياتها ضعيفة جدا وفقيرة

واللادا جرانتا والشيرى اريزو5 عربيات متفوقة فى المقارنة بالنسبة لفئتها السعرية

عاوز تاخد القائمة الاولى وهتتحمل مشاكل الصينى شغال وهتبقا افضل عربية شيرى اريزو5

ولو عاوز القايمة التانية بعد خصم الثلث من تقييم الصينى برضه شغال وهتبقا افضل عربية فى الفئة السعرية دى اللادا جرانتا

واكيد كل انسان مسئول عن اختياراته

اشكركم لحسن المتابعة

السلام عليكم ورحمة الله وبركاته

2 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01113276111 - 01201039849
Happy
Happy
100 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts