اشترى عربيتك من الاتحاد الاوروبى ووفر فلوسك الاستيراد خطوة بخطوة

Read Time5 Minute, 32 Second

اصدقائى الاعزاء مرحبا بكم في طريقة استيراد سيارة من دول الاتحاد الاوروبى بالتفصيل والاوراق المطلوبة هتدفع كام  والوقت اللى هتاخده قد ايه
وهتوفر مبلغ محترم ولا الموضوع مايستاهلش

كل المعلومات دى هتلاقيها في الفيديو وده اللينك بتاع الفيديو على اليوتيوب

مع بداية شهر يناير الماضى، طبقت الدولة المصرية المرحلة الاخيرة من التخفيضات الجمركية على أسعار السيارات ذات المنشأ الأوروبي، بموجب اتفاقية الشراكة المصرية الأوروبية، المعروفة  بـ”زيرو جمارك”،او اللى هى اتفاقية الجات وانتظرالكثير من الناس انخفاض أسعار السيارات بعد هذا القرار، وهذا ما حدث بالفعل من شركات السيارات الاوروبية التي تسعي لإنعاش حركة مبيعات السيارات بالسوق المصري
انما في مصر للاسف كتير من وكلاء السيارات والموزعين لسه عايشين في عصر الديناصورات وعاملين من بنها
عموما

اللى كتير من الناس مايعرفهوش أنهم بإمكانهم استيراد سيارة أوروبية جديدة والموضوع سهل جدا
طيب  لو عاوز مستعمل علشان السعر ارخص بكتير جدا  وفى المتناول
للاسف ده  فيلم كبير جدا  لانك لازم تكون اول مالك للسيارة
ولازم تثبت انك صاحب السيارة من خلال اقامتك خارج مصر في دولة المنشأ  وتثبت تاريخ شراء السيارة وتقدم برينت يثبت أنك أول مالك لها في الدولة الأوروبية المرخص بها السيارة بجانب تقديم ترخيص السيارة في هذه الدولة.
ولازم  يكون مستلم السيارة فى الميناء في مصر هو مالكها شخصياً أو بتوكيل صادر منه لقريب حتى الدرجة الثانية أو الزوجة .
او ممكن تستوردها نصين كقطع غيار
او تكون صاحب عزيمة بمعنى اعاقة ومعاك مايثبت الكلام ده
وفى ناس بتستورد مستعمل بإسم حد صاحب عزيمة وبيكتبوا عليه اوراق ضد وايصالات امانه وتوكيل وعقد بيع وبيتفقوا على مبلغ معين عادة من 10 الى 20 الف جنية على حسب سعر السيارة وحسب احتياج الاخ اللى هيستوردوا العربية باسمه  ودى شغلانه كبيرة جدا وفى الاخر وبعد كل ده البيع محظور

طيب
، اللى هنتكلم عنه في الفيديو ده هى السيارات الجديدة فقط علشان نستغل موضوع  الإعفاء الجمركي الكامل، ولكن بشروط حددتها مصلحة الجمارك المصرية أهمها:

اولا – أن تكون السيارة جديدة وليست مستعملة.

ثانيا – استخراج شهادة “يورو 1” من دولة المنشأ الأوروبي المنتجة للسيارة. ودى شهادة تشبه شهادة الميلاد للاشخاص وهى اللى بتوضح المكان الذى تم فيه تصنيع السلعة او انتاجها

ثالثا – أن تكون السيارة من دولة تتبع الاتحاد الأوروبي.

رابعا – فاتورة الشحن موضح بها سعر وطريقة الشحن.

خامسا – فاتورة شراء السيارة.

سادسا – بوليصة الشحن ولابد أن يتم الشحن من الميناء الأوروبي إلى الميناء المصري مباشرة.

يعني ان يتم الشحن من اَي دولة من دول الاتحاد الأوربي لانها تعتبر دولة واحدة   الي أي ميناء يختارها صاحب السيارة في مصر مباشرة بدون ترانزيت في اى دولة اخرى

وده موجود في بوليصة الشحن وهى خط السير من التوكيل الملاحي الناقل للبضاعة

سابعا – سداد الرسوم والضرائب المقررة على السيارات الأوروبية بعد شحنها للموانئ المصرية، واللى بتختلف باختلاف سعة المحرك:

السيارات أقل من 1000 سي سي الضريبة عليها 15%وتفصيلها كالاتى

14% ضريبة قيمة مضافة

1% ضريبة جدول

0% رسوم تنمية

والسيارات ذات السعة اللترية من 1000 حتى 1600سي سي يتم دفع رسوم18% ودى عبارة عن 14% ضريبة على القيمة المضافة، و1% ضريبة جدول، و3% رسم تنمية.

أما السيارات التى سعتها اللترية من 1600 حتى 2000 سى سي، فيتم فرض ضريبة 34% وتفصيلها كالاتى ضريبة قيمة مضافة 14%، و15% ضريبة جدول.  و5% رسم تنمية

و السيارات ذات السعة اللترية من 2000 سى سي، فيما أعلى فيفرض عليها 51.5% وتفصيلها كالآتى  14% ضريبة قيمة مضافة و30% ضريبة جدول.  و8.5% رسم تنمية

السيارات الكهربائية والهايبرد وعليها 14% ضريبة قيمة مضافة فقط  بدون رسم تنمية أو ضريبة جدول للسيارات والكلام ده للسيارات الأقل من 1600 سي سي .

عملية الاستيراد تتطلب وجود رقم متعاملين خاص بمستخلص جمركي وهذا الرقم يتم شراءه ويوضع على الأوراق المطلوبة.
يبقى خطوات استيراد السيارة من أوروبا

1-     مخاطبة الشركة بالدولة الأوروبية سواء مباشرة أو عن طريق وسيط يتمتع بالثقة، 2- الحصول على فاتورة شراء مبدئية من إحدى الشركات الأوروبية لضمان سلامة العملية الشرائية

3- فتح حساب بنكي مصري لتحويل ثمن السيارة على حساب الشركة المصدرة للسيارة، والحصول على عقد ملكية للسيارة مرسل من الشركة يسمح لصاحبها الجديد بالتعامل مع الجهات الحكومية المصرية (جمارك – مرور).

4-  شحن السيارة بمبلغ مالي يقدر بحوالى ألف يورو، بما يعادل 20 ألف جنيه مصري، والشحن بياخد من 15 يوم الى شهر وبعد وصولها إلى الموانئ المصرية يقدم المالك المصري، شهادة “يورو 1” والورق اللى اتكلمنا عنه وصورة بطاقة شخصية للجمارك للحصول على الإعفاء الجمركي والاستفادة باتفاقية الاتحاد الأوروبي.

ويتم إنهاء الإجراءات الجمركية وفقا لاتفاقية “الجات”، ويتم دفع الضريبة اللى ذكرناها

حتى تتم عملية تخليص السيارة من الميناء ويتم ارسال الأوراق بالبريد بعد كده لمرور رابعة في حال كان صاحب السيارة في القاهرة وترسل منها الي مرور الدراسة وبعدها يتم توزيع الأوراق على المرور التابع له صاحب السيارة والروتين ده بيستغرق في المرور ما بين 20 يوم الي شهر

طبعا اكيد هيطلع حد واحتمال كبير يكون موظف في احد التوكيلات وبيحاول يخوف الناس من الاستيراد هيقولى الموضوع مش سهل كده والكلام ده مش حقيقى 
لايافندم الموضوع ده سهل ومجرب وبيعمله ناس كتير جدا وكل يوم عددهم بيزيد
انا بقولكم الموضوع اسهل مما تتخيلوا وهيوفر عليكم مئات الآلاف وممكن يتم من خلال شركة تخليص جمركى وتريح دماغك ويتصلوا بيك لما العربية توصل الميناء وتقعد تستريح لحد مايخلصولك كل الاجراءات
عموما
انا هعمل فيديو تانى عن الموضوع ده بس هتكلم عن مقارنة مابين اسعار السيارات لعام 2020  في التوكيلات المصرية وسعرها من بلدها في المجموعة الاوروبية مضاف اليه سعر الشحن والضرائب علشان تعرفوا ان الفرق كبير جدا وغير عادل والفلوس اللى هتوفرها انت واولادك اولى بيها وخصوصا في العربيات العالية اللى سعرها يعدى ال500 الف هتلاحظ مبلغ التوفير كبير اما في العربيات اللى سعرها تحت ال300 الف هتلاقى فرقها قليل وخصوصا بعد ما الوكلاء نزلوا الاسعار بعد حملة خليها تصدى
يعنى مثلا من الفئة العالية العربية المرسيدس ايه 200 سعرها في مصر 875الف ولو استوردتها بالشحن والضرائب لحد ماتستلمها 725الف يعنى وفرت 150 الف وعربية محترمة مش ملعوب فيها بس طبعا خارج الضمان
ومن الفئة الرخيصة فيات تيبو 2019 سعرها في مصر 299000عند الوكيل ولو استوردتها 11900يورو يعنى 229الف جنية مصرى بالجمارك 18% تبقى 270 الف جنية والشحن 1000 يورو يعنى 20 الف جنية يعنى هتوصل 290الف تحت العجز او الزيادة وطبعا ده مايعتبرش توفير
بس السبب ان وكيل السيارة دى لحق نفسه بسرعة بعد حملة المقاطعة خليها تصدى ونزل في سعر السيارة علشان المخزون الكبير بتاع 2018 و 2019
يعنى في الفئات الصغيرة مش هتوفر كتير بس طبعا الميزة ان العربية مختلفة تماما عن الموجودة في مصر اما  العيب انها خارج الضمان


وفى النهاية
احب اقول لوكلاء السيارات والموزعين الكبار في مصر اتقوا الله كسبتوا كتير كفاية علشان ماتخسروش وتفقدوا ثقة الشعب المصرى لأن موضوع الاستيراد مبقاش سر والموضوع طلع سهل جدا والموظفين اللى كانوا بيعقدوا الاجراءات الجمركية على الناس زمان بدعم ورشاوى من الوكلاء والموزعين المحتكرين لتجارة السيارات علشان يفضل سر الاستيراد عندكم والبيع من خلالكم خلاص الكلام ده انتهى للأبد وبدأتم تفقدوا القوة الشرائية واخيرا ياريت تحافظوا على الباقى من العملاء وتكسبوا المكسب العادل او خليكم لحد ماشركات الاستيراد ومخلصى الجمارك يحلوا محلكم والناس تشترى من خلالهم
اشكركم لحسن متابعتكم واتمنى ان الشرح يكون مفيد والى لقاء قادم ان شاء الله

2 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01113276111 - 01201039849
Happy
Happy
0 %
Sad
Sad
0 %
Excited
Excited
100 %
Sleppy
Sleppy
0 %
Angry
Angry
0 %
Surprise
Surprise
0 %

Related posts