الغش التجارى فى مجال استيراد وتجميع السيارات فى مصر توكيل منصور وتوكيل غبور

Read Time6 Minute, 35 Second

الغش التجارى فى مجال استيراد وتجميع السيارات فى مصر

السلام عليكم ورحمة الله وبركاتة

اتمنى نشر الموضوع على اوسع نطاق

يمكن ينقذ حد قبل مايتهور ويتورط ويشترى وبعد كده يندم ويعمل فيديو

توكيل غبور

توكيل منصور

انا عملت موضوعين بالفيديوهات والاثباتات والمصادر عن كلا من توكيل منصور وتوكيل غبور

لكن للاسف الفيديوهات حذفت من القناة وقمت برفعها على قناة اخرى

المواضيع والفيديوهات مافيهاش رأى شخصى ليا او لاى حد

علشان فى ناس بتفتكر انى بهاجم هذه التوكيلات علشان مدعوم من توكيلات تانية

لا ابدا والفيديوهات دى خاصة بفضائح غبور ومنصور وهى عبارة عن تجارب شخصية وعملية لأشخاص اشتروا سيارات من التوكيلات دى

وذاقوا تجارب مريرة من عيوب صناعة وإهمال وهروب من المسئولية ونصب وغش تجارى

انت لما بتشترى سيارة تابعة لتوكيل معين

وبتحط شقى عمرك او بتلزم نفسك بقسط شهرى ممكن يكون نصف مرتبك

مع انك بهذا المقدم ممكن تشترى عربية مستعملة

بس طبعا بتقول المستعمل مشاكله كتيرة واعطال وميكانيكية وبهدلة , علشان كده بتريح دماغك وتشترى زيرو

المشكلة ان اللى بيحصل من التوكيلات دى جعل المستعمل بقا افضل من الزيرو من كثرة المشاكل والعيوب

التوكيلات او المستورد المصرى عموما سواء بيعمل فى مجال السيارات او اى مجال تانى مش بيدور على الافضل ودى حاجة كلنا عارفينها ومش محتاجة شرح

لما بيستورد سيارة من الخارج والكلام ده هتلاقوه واضح فى الفيديوهات , يبحث عن الأرخص وليس الافضل

يعنى بيروح للشركة اللى هيستورد منها او هياخد الوكالة بتاعتها ويقولهم عاوز الموديل ده ولكن بالرقم ده

الشركات الأوروبية علشان محترمة بتشيل بعض الكماليات والمواصفات  وانظمة الامان من السيارات اللى هتروح للمستورد ده

وبتكتب فى العقود وفى كتيب السيارات الانظمة الموجودة فقط

يعنى الشركات مش بتغش لكن بتفضى السيارة من الاشياء المكلفة علشان يوصلوها للسعر اللى عاوزة البيه الوكيل

لأن من مصلحتهم يزودوا المبيعات ويغزوا الاسواق العالمية ومشكلة الكماليات وانظمة الامان الناقصة ماتخصهمش لكن تخص الدولة اللى تابع ليها الوكيل واللى هتوافق على دخول سيارات ناقصة

وطبعا الوكيل موافق مقدما على اى حاجة المهم السعر يكون رخيص علشان يعرف يعمل مصلحة كويسة

والحاجة اللى تضحك ان الوكيل بيبيع السيارات فى مصر بأعلى من سعرها فى كل الدول الاوروبية طبعا والعربية كمان مع انها منزوعة الدسم

يعنى مش بيفاصل مع الشركة المنتجة فى السعر علشان ينزل لنا حاجة رخيصة لا سامح الله

والاصعب من استيراد الاوروبى والامريكى هو استيراد السيارات من الصين

لأن الصينيين مايهمهمش سمعة منتج ولا غيره , دى ناس بتدور على لقمة العيش ومش مهم اى حاجة تانية , يعنى من الآخر زيهم زى الوكيل

بياكلوا عيش وده طبعا واضح فى جميع منتجاتهم اللى بتنزل الاسواق المصرية واللى مالهاش اى علاقة بمنتجاتهم اللى بتنزل فى باقى دول العالم

المهزلة اللى بتحصل فى العربيات الصينى فى مصر مميتة

بمعنى ان العربيات الصينى ممكن وبقول ممكن لان الموضوع ده راجع للشخص اللى بيستورد إنما احنا كدولة بندخل اى عربية ونرخصها عادى جدا وكل المطلوب فى المواصفات يتلخص فى سعة المحرك كشرط لزيادة الجمارك

العربيات الصينى بيبيعوها على انها بأنظمة امان وكماليات عالية علشان الوكيل يعرف يسوقلها ويبيعها فى بلده

الصينيين مش بينزعوا الكماليات وانظمة الامان للأسف

هما بيحطوا خامات سيئة وبعض الانظمة بتبقى مجرد حبر على ورق فى كتيب السيارة انما مش موجودة

يعنى مثلا 7 وسائد هوائية واللى راكب 2 بس

او 7 وسائد هوائية بس راكبين بخامات سيئة ومتصلين مع سينسور واحد بس يعنى لازم الحادثة تحصل من جنب واحد بس وانت وحظك وحتى لو السينسور حس بالحادثة فتحة الوسائد مشكوك فى امرها وبرضه انت وحظك

لو تفتكروا الموبايلات الصينى اول مانزلت كنت تلاقى موبايل موجود فيه ايقونات الواتس والفيسبوك وكذا وكذا لكن مافيش حاجة منهم ينفع تشتغل وكلهم صور ايقونات بس ولما تدوس عليهم ماتروحش فى اى مكان

يعنى من الآخر الصينيين مع وكيل عديم الضمير ممكن يبيعولك عربية مرسومة على ورقة !!!!

ووقت الجد لاهتلاقى وسائد هوائية ولا فرامل ايه بى اس ولا اى بى دى ولا اى حاجة

هتشترى عربية من التوكيل فيها 7 وسائد هوائية واسماء كتيرة لأنظمة امان تخليك تطمئن وتخش فى الحيطة بقلب جامد

لكن وقت الحادثة ابقا قابلنى لو حاجة اشتغلت او حتى لو اشتغلت مش هتشتغل صح

ومع الوكلاء معدومى الإنسانية زى ماهتشوفوا فى الفيديوهات

هيتحجج الوكيل بمجموعة من الحجج الفاضية اللى حافظها مهندسين التوكيل وهيفسحوك شوية لحد ما الضمان ينتهى

زى لما تجيب سباك مثلا ويخربلك الدنيا وتيجى تحاسبه يعيش فى دور المظلوم وتسمع منه احلا هرى ويقنعك ويثبتلك ان الصح كده ولازم الحنفية تسرب علشان لو الضغط زاد فى المواسير هتنفجر العمارة

عموما المسار الطبيعى للشكوى زى ماهتشوفوا فى الفيديوهات

ان حضرتك بتروح الى جهاز حماية المستهلك وهيطبطبوا عليك شوية وتعيط فى صدرهم ويبعتوك الى كلية الهندسة

وفى كلية الهندسة هياخدوا مصاريف كشف 1% من ثمن السيارة مش فاهم ليه

يعنى هو الكشف على عربية سوزوكى التو غير الكشف على مرسيدس ….. ماعلينا !!!

بعد دكتور من كلية الهندسة مايكشفلك على العربية وياخد السبوبة ويكتبلك التقرير اللى زى الفل

هيرجع التقرير على حماية المستهلك اللى بدورها الخطير هتخاطب الوكيل وتطلب منه تعويضك , وطبعا الوكيل هيخاف من جهاز حماية المستهلك ومن الرعب بتاعه وخوفه على سمعته هيرفض تقرير كلية الهندسة ويطلب تقرير تانى جديد من كلية هندسة تانية

يعنى مثلا لو التقرير الاول كان فى هندسة القاهرة التانى يكون فى حلوان او المطرية وهكذا

وتقعد حضرتك تلف مابين التوكيل وحماية المستهلك وكليات هندسة جمهورية مصر العربية لحد ما تزهق وتعرض عليهم فلوس علشان يسيبوك تريح شوية وطبعا هتقول فى الآخر حسبي الله ونعم الوكيل

وساعتها هيقدملك الوكيل زيادة فى الكيلومترات علشان الضمان او تغيير زيت ببلاش او اى حاجة تافهة ماتكلفهمش

المأساة الاكبر والأخطر ان غالبية اللى بحصل فى التوكيلين المحترمين غبور ومنصور , أكثر من اللى قريته او شوفته بمراحل

ليه ؟

لأن التوكيلين مش بيستوردوا سيارة كاملة من الخارج …… ايه ؟؟؟

ايون …. التوكيلات دى بتستورد أجزاء وبتكمل الباقى من عندها

يعنى نسبة من اجزاء السيارة من بلد المنشأ والباقى من مصر والتجميع مصرى

والغريب انهم بيستوردوا الأجزاء دى من الصين مش من دولة المنشأ , يعنى عربية اوروبية لكن اجزائها صينى وتجميعها مصرى

بمعنى ان الوكيل بيتفق مع مصنع فى الصين يصنع الصاج والشاسية وممكن كمان الموتور ويكمل من مصر الشكمان والريدياتير والكاوتش والزجاج والفايبر

ويجمع كل الزبالة دى ويحط عليها ماركة السيارة اللى حضرتك بتشتريها

يبقا حضرتك شارى عربية اوروبية او امريكية لكن فى الاصل هى اجزاء صينى على هندى والتجميع مصرى

فتطلع فى الآخر مسخ بأربعة عجلات والناس فى مصر يشتروا ويشتكوا ويقولوا حسبنا الله ونعم الوكيل

المصيبة الاكبر ان التوكيلين السابق ذكرهم لم يكتفوا بكل هذا المكسب

لكن بيقلدوا بعض فى الغلط , ولو الدولة لم تتدخل فى هذه المهزلة , الموضوع هيبقا عام وكل التوكيلات هتعمل كده

فعلى سبيل المثال

توكيل منصور عنده عربية انتهى انتاجها من عشرات السنين , وكان اسمها دايو لانوس وكانت كورى محترمة

العربية دى بيجيب اجزاءها من الصين حتى الآن وبيجمعها بنفس الشكل القديم اللى كلنا حافظينه وحاطط عليها علامة شيفرولية

توكيل غبور قلده وعمل نفس الكلام فى هيونداى فيرنا , اللى ماحدش بينتج الشكل بتاعها من عشرات السنين , لكن غبور بينتجها على انها هيونداى فيرنا وهى صينى والفيرنا اللى بتنتجها شركة هيونداى فى الخارج بيجيبها مصر على انها هيونداى اكسنت …. حاجة عجيبة !!!

يعنى عك وغش تجارى وتغيير فى المواصفات والإمكانيات

انا خايف فى يوم من الأيام الاقى عربية بى واى دى عليها علامة مرسيدس ووكيل بيبيعها بالملايين

دول العالم بتحاول تفتح إقتصادها على باقى الدول وده بيستلزم شفافية إنما هنا فى مصر انا حاسس اننا بننغلق على نفسنا ومجال استيراد وتجميع السيارات بقا سر خطير ماحدش يعرفه

هل تعتقدوا ان … وزارة الصناعة والتجارة … والغرفة التجارية  … وجهاز حماية المستهلك مايعرفوش اللى بيحصل ده ؟؟؟

اكيد طبعا يعرفوا كل الكلام ده

عموما الفيديوهين قايلين كل حاجة ومش محتاجين لشرح

كامل الإحترام لجميع التوكيلات المصرية اللى بتراعى ربنا ومش بيخدعوا عملائهم وبيكسبوا بالمعقول

الفيديوهات المعروضة على قناتنا على اليوتيوب او على الموقع او على المدونة والتى تخص توكيلات غبور ومنصور هى عبارة عن تجارب شخصية وعملية امصريين اشتروا سيارات وبعد البهدلة واللف اللى ذكرته لحضراتكم لم يصلوا الى اى شئ فقاموا بتصوير مصيبتهم حتى لايقع فى هذه الغلطة احد

وانا كل اللى عملته انى جمعت بعض هذه الفيديوهات مش كلها

لأن الفيديوهات كتيرة جدا ولو هجمعهم كلهم عاوز فيديو 24 ساعة لكل توكيل

واخيرا تمنياتى بالتوفيق للجميع

وحاولوا تنشروا الموضوع والفيديوهات على قد ماتقدروا حتى لايتورط احد مع هذين التوكيلين

والسلام عليكم ورحمة الله وبركاتة

0 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01004003204 - 01008330575
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts