التصرف السليم لإيقاف السياره عند انفجار الاطار لو بتسوق على سرعه اعلى من 100 كيلو متر / ساعه

Read Time3 Minute, 18 Second

 موضوع جديد ومفيد جدا والموضوع  ده اكيد قابلكم  او هيقابلكم ولازم نكون مستعدين

 اجابه السؤال اللي دائما بنساله متاخر بعد حصول المصيبه وهو اعمل ايه لو فرده كاوتش انفجرت وخصوصا لو الكاوتش الامامي لان الموضوع هيختلف تماما عن الكاوتش الخلفي او الاطار الخلفي

حاولوا تنشر االمعلومات والفيديو لعل وعسى يكون سبب في نجاه نفس مع تمنياتي للجميع بالسلامه

انا هاقول 8 نصائح تقدر بيها انك تخرج من الإبتلاء ده بخير انت واسرتك

طبعا باذن الله الرحمن الرحيم الستار اللطيف اولا واخرا

وكل شيء بيد الله سبحانه وتعالى يعني لازم في البدايه تتق الله في اعمالك وحياتك وما تظلمش حد بعد كده تتبع النصائح الآتية

اولا : قبل التحرك بالسياره حتى لو مشوار صغير داخل المدينه اربط حزام الامان علشان على الاقل الوسائد الهوائيه تعرف تشتغل ولو عاوز تعرف شكل الحادثه من غير حزام امان او وسائد هوائيه اتفرج على فيديو في القناه عن فائده حزام الامان الوسائد الهوائيه وطريقة عملهم هسيبلكم لينك الفيديو فى الوصف

ثانيا : عند انفجار احد الاطارات حاول تبقى هادئ قدر الامكان علشان تعرف تفكر و امسك عجله القياده بيديك الاثنين وسبتها كويس جدا وحاول تحافظ عليها مستقره

ثالثا : النصيحه الاهم وهى انك تخلي رجلك بعيده عن الفرامل تماما ما تحاولش الضغط على الفرامل مهما حصل لأن ضغطه واحده على الفرامل على السرعه العاليه مع كاوتش منفجر معناها انقلاب السياره لا قدر الله

حتى لو ضغطة الفرامل ضعيفه او فاكر انك هتعرف تهدي السرعه من دواسة الفرامل …. احب اقولك وقت الصدمة والخوف والعصبية هتحول الضغطة اللى انت مفكرها ضعيفة الى ضغطة قوية جدا وإحتمال رجلك تطلع من الإكصدام الامامى

علشان كده النصيحة الاهم هى انك تبعد رجلك عن دواسة الفرامل نهائيا

رابعا : ثبت على قد ماتقدر المسار بتاعك وماتحاولش تغير الحارة اللى انت ماشى فيها او تركن على يمين الطريق

لانك لو حركت عجلة القيادة فى اى اتجاه مش هتعرف ترجعها تانى للخط المستقيم

خامسا : لو عربيتك مانيوال حاول تقلل السرعة من صندوق التروس عن طريق تسقيط الغيارات بمعنى انك لو على الغيار الخامس تنزل للرابع ثم الثالث والثانى والاول ومايهمكش الصوت العالى اللى هتسمعه من الموتور ومن صندوق التروس  هتحس ان فى معركة وخناقة بين الموتور والفتيس وهتسأل ايه ده

هقولك ان الطبيعى ان فى خناقة بين الاتنين وغالبا الموتور هو اللى بيكسب وبيكسر التروس بتاعة الفتيس لكن الحمد لله على كل حال ومش مهم الخسائر

المهم انك تعيش وساعتها ممكن تشترى فتيس جديد ياسيدى وده طبعا احسن ما الورثة يشتروا عربية جديدة

اما لو عربيتك اوتوماتيك فالعربية هتعمل الموضوع  ده لوحدها لانك شايل رجلك من على دواسة البنزين لكن طبعا ببطئ اكثر وهتحافظ على الفتيس

بس اهم حاجة قبل ماتسقط غيارات من الفتيس  ثبت العربية الاول بيديك الاثنين واتأكد انها مستقرة

لانك هتضحى بيدك اليمين الاقوى فى تثبيت عجلة القيادة علشان تنقل بيها الغيارات وده هيتسبب فى حمل شديد على اليد اليسار من عجلة القيادة

فأهم حاجة قبل تغيير نقلات الفتيس تثبيت السيارة لانك لو سيبت عجلة القيادة واتحركت واتغير الاتجاه علشان تردها تانى هتقلب العربية

سادسا : ماتحملش هم الفرامل لان الدراج الناتج عن الاطار المنفجر هيقوم بمهمة الفرامل وهيخفف من السرعة بس فى نفس الوقت هيحاول يغير الإتجاه

سابعا : عند انخفاض السرعة الى 50 كم/س ممكن نضط الفرامل  لكن بدون عصبية كأنك بتهدى العربية قبل الإشارة

ثامنا :وللوقاية من كل الكلام ده حاول تكشف دايما على الكاوتش والعافشة  ولو فى إنتفاخ او بيسموها بالونة ده معناه ان الكاوتش جاب آخره وعلى وشك الإنفجار

ولازم يتغير النهاردة قبل بكرة

إحذر تمشى عل اطارات فيها انتفاخ

ولو مش معاك فلوس تغيره إركن العربية واركب مواصلات لحد ماربك يرزق

سرعتك لازم ماتعديش ال 100 كم/س ولو هتعلى عن ال 100 يبقا آخرك 120 كم /س شوية وبعدين تنزل لل 100

انت سائق متمكن ومحترف لكن مابيغرقش الا العويم

لان السباح المحترف هو اللى بيصيبه الغرور ويخليه يتحدى ويعدى البراميل

نفس الكلام … مش بيعمل حادثة غير السائق المحترف لان هو الوحيد اللى هيتجرأ ويغامر ويعدى السرعة وهو برضه اللى هيستهتر ويكمل طريقة بكاوتش بايظ او عفشة فيها مشاكل

فى النهاية تمنياتى لكم بكل الخير والصحة والسعادة وربنا يلطف بينا جميعا

والسلام عليكم ورحمة الله وبركاتة

0 0

About Post Author

matrex2018

مهندس اتصالات عملت فى مجال انظمة الامان والتوجية والمحركات ونواقل الحركة الحديثة للسيارات على مدى 25 عام خبرة فى هذا المجال بيع وشراء وتقييم وإصلاح وتعديل 01113276111 - 01201039849
Happy
Happy
0 %
Sad
Sad
0 %
Excited
Excited
0 %
Sleppy
Sleppy
0 %
Angry
Angry
0 %
Surprise
Surprise
0 %

Related posts